Separatçılar 3 isqtiqamətdə hücuma hazırlaşır

Donetsk şəhərindəki üsyançıların lideri Aleksandr Zaxarçenko Ukrayna höküməti ilə yeni sülh danışıqlarına getməyəcəyini bildirib.

Publika.az-ın məlumatına görə, separatçı lider şərqdə daha çox ərazinin nəzarətini ələ keçirməyi vəd edib.

“Artıq heç bir danışıq və rotasiyalar olmayacaq. Bizim tərəfdən daha atəşkəs barədə danışıqlar aparılmayacaq”, - Zaxarçenko bildirib.

Zaxarçenko hücumları “Donetsk vilayətinin sərhədlərinə" çatana kimi davam etdirəcəyini deyib.

"Kiyev bizim 3 istiqamətdə hücum edə biləcəyimizi başa düşmür", - separatçıların lideri əlavə edib.

Ukrayna hökumətilə separatçılar arasında atəşkəs barədə razılaşma sentyabrın 5-də əldə olunub. Hərçənd ki, Minskdə imzalanan razılaşmaya rəğmən tərəflər arasında silahlı toqquşma hallarının arası kəsilməyib.

Minsk razılaşması Donbas regionuna xüsusi statusun verilməsi və Ukrayna şərqində silahlardan azad - 30 kilometrlik zonanın yaradılmasını nəzərdə tutub.

Kiyev üsyançılar tərəfində 9,000 rusiyalı əsgərin vuruşduğunu bəyan edir. Rəsmi Moskva bu iddiaları təkzib edərək Ukraynada yalnız könüllülərin döyüşdüyünü bildirir.