Pakistan Əfqanıstana demarş elan etdi

Əfqanıstanın İslamabaddakı müvəqqəti işlər vəkili bu gün Pakistan Xarici İşlər Nazirliyinə (XİN) çağırılıb.

Publika.az xəbər verir ki, bu barədə Pakistanın XİN məlumat yayıb.

Məlumata görə, Xayber-Paxtunxva əyalətində polis postuna terrorçuların hücumu ilə əlaqədar ona demarş elan edilib.

"Hadisənin təfərrüatlı araşdırılması, eləcə də toplanmış sübutlar və texniki kəşfiyyat məlumatları hücumun Əfqanıstanda yaşayan terrorçular tərəfindən planlaşdırıldığını göstərir", - XİN-in bəyanatında bildirilib.

Kabilin nümayəndəsinə İslamabadın Əfqanıstan ərazisindən Pakistana qarşı terror hücumları üçün istifadənin davam etməsindən ciddi narahatlığı ifadə olunub. Əfqanıstan tərəfinin diqqətinə çatdırılıb ki, İslamabad bu "vəhşilik aktının" səbəbkarlarının hərəkətlərinə qətiyyətlə cavab vermək hüququnu özündə saxlayır.

"Terrorizmlə mübarizə ümumi işdir və Əfqanıstanın "Taliban"ı öz ərazilərinin digər ölkələrə qarşı terror aktları üçün istifadə olunmasına yol verməmək öhdəliyini yerinə yetirməlidirlər", - bəyanatda qeyd olunub.

Xatırladaq ki, "Fitnə-əl-Xəvaric" qruplaşmasının yaraqlıları 9 may 2026-cı il tarixində Xayber-Paxtunxva əyalətinin Bannu rayonundakı Fateh-Xel polis postunu partladıblar. Hücum nəticəsində 15 polis əməkdaşı həlak olub, biri dinc sakin olmaqla, 4 nəfər yaralanıb.