Bu ölkə Rusiyaya qarşı yeni cəbhə açır: Regionda NATO hərəkətə keçir

İsveç Arktika regionunda NATO-nun hərbi mövcudluğunun gücləndirilməsini dəstəkləyir.

Publika.az xəbər verir ki, bu barədə Rusiyanın Stokholmdakı səfiri Sergey Belyayev “RİA Novosti”yə müsahibəsində bildirib.

Onun sözlərinə görə, Stokholm Arktikada NATO-nun iştirakının artırılmasını dəstəkləyir və bu ərazini Baltik dənizi ilə yanaşı, Rusiya ilə qarşıdurma zonası kimi nəzərdən keçirir. Diplomat qeyd edib ki, bu yanaşma İsveçin bu il qəbul etdiyi yenilənmiş Arktika strategiyasında da öz əksini tapıb.

Xatırladaq ki, may ayında Kanada, Danimarka, Finlandiya, İslandiya, Norveç, İsveç və ABŞ Arktikada və Uzaq Şimalda hərbi mövcudluğun gücləndirilməsi barədə birgə bəyanat imzalayıb.

Belyayevin sözlərinə görə, Rusiya NATO-nun Arktikadakı fəallığını və regionda gərginliyin artırılmasını nəzərə alır. O bildirib ki, Moskva bu məsələdə yalnız öz maraqlarından çıxış edəcək və əsas prioritetlərdən biri Arktikada milli təhlükəsizliyin təmin edilməsidir.

Diplomat Qərbin Arktikanı münaqişə zonasına çevirməyə çalışdığını da iddia edib.

Akqabay