İŞİD-in yardımına 5 batalyon gəldi - SİYAHI

İŞİD terror təşkilatı müxtəlif ölkələrdən gələn minlərlə döyüşçünü Mosula qarşı həyata keçiriləcək mümkün hərbi əməliyyatlara cavab vermək üçün hazırlayır.

Publika.az xarici mediaya istinadən xəbər verir ki, bu barədə İŞİD-in sözçüsü Əbu Saad Əl-Ənsari bildirib.

O, dünyanın müxtəlif ölkələrindən İŞİD-ə qoşulmaq üçün yola çıxan minlərlə döyüşçünün Mosula çatdığını ifadə edib. Eyni zamanda İŞİD-in Mosul imamı olan Əl-Ənsari cümə xütbəsində “kafirlər və fars gücləri"nin hücumlarına cavab vermək üçün Mosula dünyanın müxtəlif ölkələrindən 5 batalyon gəldiyini deyib.

Əl-Ənsarinin sözlərinə görə, bunlar Liviyadan Ömər bin Xəttab, Suriyadan Əbu Yasin, Filippindən Əl-Muttasim Billah, Sudandan Əl-Nasır və Misirdən Əl-Haris batalyonları olduğunu söyləyib.

Təşkilatın Tikritdəki məğlubiyyətinə toxunan Əl-Ənsari geri çəkilmənin planlı şəkildə edildiyini və orada döyüşmədiklərini iddia edib.

Qeyd edək ki, İŞİD Ninova vilayətinin inzibati mərkəzi olan Mosul şəhərini ötən ilin yay aylarından nəzarətdə saxlayır.

Ömər Dağlı