“Ulduz müharibələri” gerçəkləşir? - Alimlər iki günəşi olan 27 planet aşkarladı

Avstraliya, ABŞ və Kanada alimləri iki və daha çox ulduz ətrafında dövr edən 27 yeni ekzoplanet aşkar ediblər.

Publika.az xəbər verir ki, bu barədə NASA-nın TESS kosmik teleskopunun məlumatlarına əsaslanan araşdırma "Monthly Notices of the Royal Astronomical Society" jurnalında dərc olunub.

Tədqiqatçılar TESS teleskopunun topladığı fotometrik məlumatları təhlil edərək "Gaia DR3" kataloqunda yer alan 1590 tutulmalı qoşa ulduz sistemini araşdırıblar.

Məqalədə qeyd olunur ki, “ikiqat ulduz sistemləri ətrafında fırlanan 27 yeni planet aşkar olunub”.

NASA-nın rəsmi açıqlamasına görə, alimlər ən azı iki il ərzində toplanmış məlumatları analiz ediblər. Aşkarlanan obyektlərin dəqiq kütləsi hələ müəyyən edilməyib. Lakin hesablamalara əsasən, ən kiçik planetin kütləsi Yer kürəsinin təxminən 12 qatına bərabərdir. Ən böyük namizəd isə Yupiterdən 10 dəfə daha ağır ola bilər.

Elmi nəşr "EurekAlert" bu planetləri Tatuin ilə müqayisə edib. Xatırladaq ki, bu uydurma planet "Star Wars" ("Ulduz müharibələri" kainatında iki günəş ətrafında dövr edirdi.

Alimlər hesab edirlər ki, bu cür kəşflər kainatda planet sistemlərinin formalaşması haqqında mövcud təsəvvürləri daha da genişləndirə bilər.

Müəllif: Adəm