Şagirdini zorlamaqda ittiham olunan direktor işdən çıxarıldı

Zərdabın Şahhüseynli kənd tam orta məktəbin direktor əvəzi Ceyhun Tofiqli işdən çıxarılıb.

Təhsil Nazirliyindən Publika.az-a verilən məlumata görə, C.Tofiqlinin vəzifəsinə noyabrın 16-dan xitam verilib.

***

Zərdab Rayon Təhsil Şöbəsindən Publika.az-a bildirib ki, Təhsil Şöbəsi müdirinin müvafiq əmri ilə Şahhüseynli kənd tam orta məktəbin direktoru vəzifəsi həvalə olunan Şirəliyev (Tofiqli) Ceyhun Hafis oğlu noyabrın 14-də saat 23.00 radələrində həmin məktəbin 11-ci sinif şagirdi 1999-cu il təvəllüdlü Abduləliyeva Leyla (ad şərtidir) Rəmzi qızı ilə onun yaşadığı evin həyətində söhbət edərkən anası görüb və bu barədə Zərdab Rayon Polis Şöbəsinə məlumat verib.

Şagirdin valideynlərinin şikayəti əsasında C.Şirəliyev Rayon Polis Şöbəsinin əməkdaşları tərəfindən saxlanılıb, haqqında cinayət işi açılmayıb. Hazırda iş Rayon Prokurorluğunun nəzarətindədir və bununla bağlı araşdırma aparılır.

Məktəbli qız tibbi müayinədən keçirilib və heç bir təcavüz halının olmadığı müəyyən edilib.

****

Zərdab rayon Şahhüseynli kənd orta məktəbinin direktoru Ceyhun Tofiqlinin zorladığı iddia edilən məktəblinin atası Rəmzi Abduləliyev Publika.az-a hadisənin təfərrüatlarını danışıb:

“Dünən gecə saat 02 radələrində qız anasının evində yatdığı yerdə telefonuna zəng gəlib. Zəng edən direktor Ceyhun olub. Qızım 9-cu sinifdə oxuyur, bir neçə fəndən hazırlığa gedir. Tarix fənnindən də Ceyhun müəllim hazırlaşdırır. Sən demə, uşağı dərsə hazırlamayıb, pis fikirləri var imiş. Dünən gecə də gələndə qıza kitab gətirdiyini deyib, həyətə çağırıb. Qızımdan bir az sonra yoldaşım həyətə çıxıb. Ceyhunun qızımı qucaqladığını, paltarlarını cırmağa çalışdığını görüb. Anası qadındır, gücü çatdığı qədər şillə-təpiklə onu vurub, o da qaçıb gedib. Telefonu, ayaqqabısı da həyətdə qalıb. Anası bir az gec getsə idi, nə olardı, təsəvvür etmirəm. Bizim bildiyimizə görə, Ceyhun Volqoqrad şəhərində 13 yaşlı qızı pis yola çəkdiyinə görə 4 il həbs cəzası çəkib”.

R.Abduləliyev bildirib ki, bu vaxta qədər direktorun qızına fərqli münasibət göstərməsi barədə heç nə eşitməyib:

“Belə bir hadisənin baş verə biləcəyi kimin ağlına gələrdi? Məktəbdə direktor müavini işləyib, indi də direktordur. Təhsil Nazirliyinin təyin etdiyi bir adamın belə bir iş görəcəyini düşünmədik. Məktəbdə mənim qızım kimi yüzlərlə şagird oxuyur. Amma qızım bu vaxta qədər direktorun fərqli münasibəti ilə bağlı heç nə deməyib. Bu barədə polisə məlumat vermişik. Hələ ki, ekspertiza təyin edilməyib, 6-cı günə saxlayıblar. Amma qızın vəziyyəti normaldır”.

Kənd icra nümayəndəsi Abubəkir İsayev Publika.az-a bu barədə yalnız polis kəndə gələndən sonra xəbər tutduqlarını deyir:

“Bizdə olan məlumata görə, hadisə başqa bir evdə baş verib. Ceyhun bizim kəndin sakinidir. Bu vaxta qədər onunla bağlı belə bir söz-söhbət eşitməmişik”.

C.Tofiqlinin 32 yaşı var. Hazırda polis bölməsində saxlanılır.

****

Zərdab rayonu Şahhüseynli kənd orta məktəbinin direkteru Ceyhun Tofiqli saxlanılıb.

Avropa.info məlumatına görə, məktəb direktoru rəhbərlik etdiyi orta məktəbdə şagirdlərindən birini zorlamaqda ittiham olunur. Onun haqqında şagirdin valideynlərinin polisə şikayət etdiyi və bu gün polis tərəfindən saxlanıldığı qeyd edilir.

Hazırda Ceyhun Toqifli haqqında cinayət işi başladılıb və iş Zərdab rayon prokurorluğu tərəfindən araşdırılır.

Zərdab rayon polis şöbəsi faktı təsdiqləyib. Şöbədən bildirilib ki, cinayət işi araşdırılmaq üçün Zərdab rayon prokurorluğuna göndərilib.

Gülxar