“Son 1 il 2 ayda 67 meyit qalığını təhvil almışıq” - Hərbi Prokurorluq rəsmisi

“Ermənistanın Azərbaycana qarşı hərbi təcavüzü nəticəsində Birinci Qarabağ müharibəsində 3 min 890 nəfər Azərbaycan vətəndaşı itkin düşmüş şəxs kimi Dövlət Komissiyasında qeydiyyata alınıb. Onlardan 3 min 171 nəfəri hərbçi, 719 nəfəri mülki şəxsdir. Mülki şəxslər içərisindən 71 nəfəri yetkinlik yaşına çatmamış uşaq, 267 nəfəri qadın, 326 nəfəri yaşlı insan olub”.

Publika.az “AzərTAc”a istinadən xəbər verir ki, bu fikirləri Hərbi Prokurorluğun xüsusi istintaq şöbəsinin mühüm işlər üzrə böyük müstəntiqi Emil Ağayev söyləyib.

Onun sözlərinə görə, həmin şəxslərin taleyinin müəyyən edilməsi İkinci Qarabağ müharibəsindən sonra müəyyən imkanlar yaranıb: “Belə ki, işğaldan azad olunmuş ərazilərdə axtarış işlərinin aparılması, qohumlarının və şahidlərin verdiyi məlumatlar əsasında onların ehtimal olunduğu yerlərin müəyyən edilməsi istiqamətində işlər görülüb. Bu istiqamətdə Beynəlxalq Qızıl Xaç Komitəsi (BQXK) və Əsir və itkin düşmüş, girov götürülmüş vətəndaşlarla əlaqədar Dövlət Komissiyası, eyni zamanda, Prokurorluq tərəfindən müəyyən işlər görülüb”.

O bildirib ki, itkin düşmüş şəxslərin ümumi sayından 872 nəfər, o cümlədən 29 uşaq, 98 qadın və 112 qoca əsir-girov götürülmüş və ya işğal edilmiş ərazilərdə qalıblar. Sonradan azad olunmuş əsir və girovlar həmin şəxsləri sağ gördüklərini təsdiq ediblər.

Ermənistan münaqişənin bütün dövrü ərzində bu şəxslər barədə məlumatları beynəlxalq təşkilatlardan gizlədib, onların sonrakı taleyi barədə məlumat verməkdən yayınıb.

“Birinci Qarabağ müharibəsində itkin düşmüş şəxslərdən 54 nəfəri Ermənistan tərəfində saxlanıldıqları vaxt sağ ikən onlarla müxtəlif vaxtlarda BQXK-nın nümayəndələri görüş keçirib. Sonradan onlardan 17-sinin meyiti təhvil verilib, 33-nün ölümü barədə məlumat verilsə də, onların meyitləri qaytarılmayıb, 4-ü barədə isə ümumiyyətlə heç bir məlumat almaq mümkün olmayıb.

Qarabağ müharibəsi dövründə 1480 nəfər azərbaycanlı erməni əsir-girovluğundan azad edilib.

2021-ci ilin fevralından cari ilin aprel ayına qədər işğaldan azad edilmiş Şuşa rayonu, Daşaltı kəndi, Xocavənd rayonu, Edilli kəndi, Xocalı rayonunun Fərrux və Daşbaşı kəndləri ərazisində müəyyən edilmiş kütləvi məzarlıqlarda aparılmış ekshumasiya zamanı, həmçinin işğaldan azad edilmiş Ağdam, Şuşa, Göygöl, Tərtər, Füzuli, Kəlbəcər və Zəngilan rayonları ərazilərdə tikinti-quruculuq işləri aparılarkən 82 şəxsə aid olduğu ehtimal edilən meyit qalıqları müəyyən edilərək götürülüb.

O əlavə edib ki, 2021-ci ildə Ermənistanın nəzarətinə qalan ərazilərimizdə dəfn olunmuş azərbaycanlılar fevralda 28, mayda 5, iyulda 3, avqustda 3, oktyabr ayında isə 5 meyit qalıqları bizə təhvil verilib.

“Həmçinin 2022-ci ilin yanvarında 6, fevralında 3, aprelin isə 14 meyit qalıqlarını təhvil almışıq. 2021-ci ilin fevralından 2022-ci ilin aprel ayınadək 67 meyit qalığını təhvil almışıq”, - deyə Emil Ağayev vurğulayıb.