Hadisə

Arvadının ayrılığına dözmədi, özünü yandırdı

7 Mart 2016 10:00

Göygöl rayon sakini intihara cəhd edib. O, ağır vəziyyətdə xəstəxanaya çatdırılıb.

Gəncə Şəhər Təcili Tibbi Yardım Xəstəxanasından anspress-ə verilən məlumata görə, Göygöl şəhər sakini, 1979-cu il təvəllüdlü Cavanşir Valeh oğlu Aşırəliyev üzərinə benzin tökərək özünü yandırıb. Ağır yanıq xəsarətləri alan 37 yaşlı kişi dərhal xəstəxanaya çatdırılıb və travmatologiya şöbəsinə yerləşdirilib. Hazırda vəziyyətinin ağır olduğu bildirilir.

Onun özünü yandırmasına səbəb həyat yoldaşının ata evinə qayıtması olub. Cavanşir Aşırəliyev tüfeyli həyat tərzi keçirir və tez-tez ailəsi ilə mübahisə edirmiş. Bu səbəbdən onun həyat yoldaşı uşaqlarını da götürüb atası evinə qayıdıb. Cavanşir isə həyat yoldaşı qayıtmasa, özünü yandıracağını bildirib. Səylərinin nəticəsiz qaldığını gördükdə isə özünə od vurub.

Faktla bağlı rayon prokurorluğunda cinayət işi açılıb, araşdırma aparılır.