Oğlunun ölümündən sonra ilk dəfə göründü - FOTOLAR

İngiltərə millisinin əfsanəvi müdafiəçisi Stüart Pirs 21 yaşlı oğlu Harlinin faciəvi ölümündən sonra ilk dəfə ictimaiyyət qarşısına çıxıb.

Publika.az xəbər verir ki, tanınmış mütəxəssis hadisədən cəmi 9 gün sonra işinə qayıdaraq “talkSPORT” radiosunda “Brentford” – “Liverpul” matçını şərh edib. O, efirdə şəxsi itkisi barədə danışmayıb və yalnız idman mövzularına toxunub.

Kənd təsərrüfatı sahəsində çalışan Harli Pirs ötən həftə faciəvi şəkildə həlak olub. İdarə etdiyi traktorun təkəri partlayıb və o, Uitkomb ərazisində yoldan çıxaraq qəzaya düşüb. Hadisə yerində həyatını itirib.

Ailənin açıqlamasında deyilir: “Əziz oğlumuzu və qardaşımızı itirdiyimiz üçün qəlbimiz qırılıb. O, yoluxucu gülümsəməsi ilə “qızıl uşaq” idi və həmişə bizim parlayan ulduzumuz olaraq qalacaq”.

Harlinin sevgilisi Holli Uotts hadisə yerinə belə bir qeyd buraxıb: “Həmişə sənin qucağında, həmişə ürəyimizdə olacaqsan. Səni sevirəm”.

Harli, Pirsin həyat yoldaşı Lizlə evliliyindən olan iki övladından kiçiyi idi. Cütlüyün Çelsi adlı qızları da var və o, peşəkar atlı kimi fəaliyyət göstərir.

Polis hadisə ilə bağlı araşdırmanı davam etdirir və qəzanın şahidlərini axtarır.