8:0 hesablı qələbədən sonra qovuldu

Braziliyanın "Flamenqo" klubu gözlənilməz qərar verib.

Publika.az xəbər verir ki, "qara-qırmızılar" komandanın baş məşqçisi Filipe Luis ilə yolları ayırıb.

Xəbər “Madureyra” üzərində Karioka çempionatının yarımfinalında qazanılan 8:0 hesablı darmadağın qələbədən dərhal sonra yayılıb və bu qərar onun üçün gözlənilməz olub.

"Globo"nun məlumatına görə, qərar start fitindən əvvəl qəbul edilib. Heç bir xəbərdarlıq və ya izahat verilməyib. Klub prezidenti Bap idman direktoru Jose Botoya tapşırıb ki, oyundan sonra keçirilən qısa görüşdə baş məşqçiyə istefa qərarını çatdırsın.

Direktorlar şurası mövsümün zəif başlanğıcı fonunda belə addımı nəzərdən keçirib. Rəhbərlik oyunun keyfiyyətindən narazı olub, məşqçilər heyəti və futbolçular qarşısında tələbləri sərtləşdirib. Son aylarda baş məşqçi, prezident və Boto arasında münasibətlər gərginləşib. Bu, müqavilənin 2027-ci ilə qədər uzadılmasına baxmayaraq baş verib.

İndi "Flamenqo" Karioka finalında “Fluminense”yə qarşı oyun ərəfəsində təcili şəkildə yeni baş məşqçi axtarır. Namizədlər arasında Leonardo Jardim də var və o, artıq Braziliyadadır.

Filipe Luis cəmi bir il ərzində U-17 komandasının məşqçisindən Braziliya Kuboku, Superkubok, Karioka çempionluğu və Libertadores Kubokunun qalibinə çevrilib. Sonda isə 8:0 hesablı qələbədən dərhal sonra istefaya göndərilib.

Heybət