Ekopublika.az

670-dən çox yeni iş yeri açılacaq

14 Noyabr 2014 16:30

"Azərbaycanda 670-dən çox yeni iş yerinin yaradılması nəzərdə tutulur". Publika.az-ın məlumatına görə, bunu İqtisadiyyat və Sənaye naziri Şahin Mustafayev yap.org.az saytına müsahibəsində deyib.

Onun sözlərinə görə, bu ilin 9 ayı ərzində müvəkkil kredit təşkilatları vasitəsilə müasir texnologiyalara əsaslanan sənaye müəssisələrinin yaradılması üzrə 20 investisiya layihəsinin maliyyələşdirilməsinə 55,5 milyon manat güzəştli kredit vəsaiti ayrılıb. Bu vəsait əsasında yeni iş yerlərinin yaradılması planlaşdırılır.

Nazir onu da vurğulayıb ki, “Azərbaycan Respublikasında 2014-cü ilin “Sənaye ili”elan edilməsi ilə bağlı Tədbirlər Planı”na uyğun olaraq, beynəlxalq təcrübə araşdırılmaqla sənaye müəssisələrinin fəaliyyətinin dəstəklənməsi ilə bağlı təkliflər hazırlanmış və bu işlər davam etdirilir.

Bu ilin 9 ayı ərzində qeyri-neft sənayesi 6% artıb, Ümumi Daxili Məhsulun 44,3%-i sənayedə istehsal olunub. Sənaye məhsulunun 80,7%-i özəl bölmənin payına düşüb.