Cənablar, öncə dövlətçilik maraqları!

Son günlər Ukrayna və Rusiya arasında baş verən gərginliklərlə bağlı sosial şəbəkələrin Azərbaycan seqmentində insanların “ciddi müzakirələrini” izləyirəm. Özü də söhbət cəmiyyətdə ciddi hesab olunan, ictimai rəy liderləri adlandırılan şəxslərin Ukrayna və Rusiya ilə bağlı fikirlərindən gedir. Doğrudur, çoxları Ukraynanın, az qismi isə Rusiyanın doğru addımlar atdığını söyləyir. Təbii ki, bunlar həmin ictimai rəy liderlərinin, fikir adamlarının şəxsi fikirləridir və hörmətlə yanaşıram. Hörmətlə yanaşa bilmədiyim bir məqam var; heç bizim maraqlarımızı güdənlər yoxdur. Həmin virtual “çəkişmələrdə” kimsə dövlətimizi, ölkəmizin rəhbərliyini məsələlərə “səssiz qalmaqda” suçlayır. Bax, buna adam cırnamasın, neynəsin?!

Birincisi, Azərbaycan işğaldan əziyyət çəkən ölkədir və xalqımız işğalın, ölkəsində savaşın nə olduğunu çox yaxşı bilir. Xalqımız Ukrayna səfirliyinin qarşısında aksiya keçirdi. Savaşdan əziyyət çəkən insanlar üçün yardımlar topladı. Tibbi malzəmələr göndərdi. Bəs cəmi il yarım bundan əvvəl erməni faşistləri Gəncəni, Bərdəni, Tərtəri vuranda eyni addımı Rusiyadan, Ukraynadan gördükmü? Hansı biri 44 günlük müharibənin sivil qurbanlarının ailələrinə, yaralılara bizim etdiyimizin eynisini etdi?! Hansı biri?! Cavab elə “A” varinatı: heç biri!

Ruslardan, ukraynalılardan bir-iki nəfər ictimai şəxsini çıxmaqla kimlər bizim haqlı davamızı bu qədər müdafiə elədi? Yenə cavab “A” variantıdır.

Cənablar, biz ilk olaraq öz dövlətimizin milli maraqlarını, ölkəmizin mənafeyini qorumalıyıq. Bunun üçün hadisələrə baxış bucağımızı bir az gendən götürməliyik.

Ölkə başçısı demiş, nəyi nə zaman edəcəyini dövlətimiz və onun rəhbərliyi çox yaxşı bilir. Artıq sözə ehtiyac yoxdur!