Bu yeməyi dadmaq istəyənlər aylarla növbə gözləyirlər

Tayvanın cənubundakı Douliu şəhərindəki Vitch Cat Kvai restoranında menyuda timsah əti də var.

Publika.az xəbər verir ki, menyunun ən populyar yeməyində bildirçin yumurtası, donuz əti, körpə qarğıdalı, qurudulmuş bambuk tumurcuqları, qara göbələk və üstü timsah ayağı ilə örtülmüş balıq pastası kubları var.

Restoran sahibinin sözlərinə görə, timsah ayaqları tapmaqda çətinlik çəkirlər. Buna görə də, gündə yalnız iki dəfə bu yemək hazırlanır. Bu yeməyin qiyməti isə nə az, nə çox, 50 dollardır.

Lakin qazanılan pulun çox hissəsi yenidən həmin qidanı hazırlamaq üçün sərf edilir. Belə ki, timsah ayağı təmizləndikdən sonra ona spirt və ədviyyat qarışığı - yəni zəncəfil, sarımsaq və soğan sürtülür. Sonra onu iki saat qaynatmaq lazımdır. Ümumilikdə, bütün proses təxminən üç saat çəkir.

Bir çox müştərilər timsah ətinin toyuq ətinin dadına bənzədiyini, lakin daha yumşaq və elastik olduğunu söyləyirlər. Bu yeməyi dadmaq istəyən insanlar böyük növbə gözləməli olurlar. Hazırda restoranda bir neçə ay üçün yer tutulub.

Aysel Şahmar