Çiyələyi uzun müddət təravətli saxlamağın yolları

Çoxlarımızın sevərək istehlak etdiyimiz meyvələrdən olan çiyələk digər meyvələrə nisbətən daha tez xarab olur. Lakin bəzi üsullarla çiyələkləri daha uzun müddət təravətli saxlamaq mümkündür.

Publika.az xəbər verir ki, yay mövsümünün ən məşhur meyvələrindən olan çiyələyin uzun müddət təravətli qalmasını təmin etmək üçün onları müəyyən şərtlər altında saxlamaq lazımdır.

Sirkəli suda yuyun: Sirkə kif sporlarını öldürür və çiyələklərin daha uzun müddət təzə qalmasına kömək edir. Bu üsulu tətbiq etmək üçün 1 stəkan sirkə və 3 stəkan suyu qarışdırın. Çiyələkləri 5 dəqiqə bu suda saxlayın. Sonra hərtərəfli yuyun və kağız dəsmal ilə tamamilə qurudun.

Soyuducuda saxlama: Soyuducuların tərəvəz bölmələrində nəm toplana bilər. Rütubət çiyələklərin tez xarab olmasına səbəb olacaq, bu səbəbdən soyuducunun orta hissələri kimi daha az rütubətli yerlərə üstünlük verilməlidir.

Sapları üstündə saxlama: Çiyələklərin gövdəsi kəsildikdə, nəmlik asanlıqla meyvənin içinə keçə bilər. Bu, onun daha tez xarab olmasına səbəb olur. Çiyələkləri saxlayarkən gövdəsini kəsməyin. Çiyələkləri yeyənə qədər gövdəsi ilə saxlamaq təravətini uzadar.

Dəlikli qutularda saxlanması: Çiyələklər nəm çəkən kimi xarab olmağa başlayır. Çiyələklər perforasiya edilmiş qablarda saxlanmalıdır, çünki hava keçirməyən qablar nəm yığılmasına səbəb olacaq.

Roza