Prezidentə məktublar: "Torpaqları azad etmək üçün əmrinizi gözləyirik"

Azərbaycan Respublikası Prezidentinin saytına son günlər ordumuzun təmas xəttində qazandığı uğurlardan ruhlanan Azərbaycan vətəndaşları, eləcə də Türkiyə, Rusiya və digər ölkələrin vətəndaşları, xaricdə yaşayan soydaşlarımız tərəfindən müxtəlif səpkili məktublar ünvanlanır.

X X X

Əziz və hörmətli Prezident!

Bütün ailəmiz adından Sizi və xalqımızı ordumuzun düşmənə sarsıdıcı zərbə endirməyə başlaması münasibətilə təbrik edirik. İnanırıq ki, Sizin rəhbərliyiniz altında nəhayət ki, ata-baba torpaqlarımız mənfur düşməndən azad ediləcək və Qələbə sevincini bütün xalqımızla birlikdə Şuşada Azərbaycanın üçrəngli bayrağı altında qeyd edəcəyik. Şəhidlərimizin ruhu şad olsun!

Bu çətin və şərəfli işinizdə Sizə böyük uğurlar arzu edirik. Tanrı Sizi qorusun.

Hörmətlə,
Əhmədov Hümeyir, akademik.
Azərbaycan Respublikası, Bakı şəhəri.

X X X

Hörmətli cənab Prezident!

Dünən cəbhədə qazandığımız qələbə münasibətilə xalqımızı təbrik edirik, şəhidlərimizə Allahdan rəhmət diləyirik. Allah əsgərlərimizi qorusun. Biz ordumuzla fəxr edirik. İnşallah, tezliklə Qarabağımızı da düşmən tapdağından azad edəcəyik.

Allaha əmanət ol, Vətənim!

Hörmətlə,
Piriyeva Xalidə Rafiq qızı.
Ukrayna Respublikası, Xarkov şəhəri.

X X X

Cənab Ali Baş Komandan!

Azərbaycanda güclü ordu quruculuğu, yürütdüyünüz uğurlu xarici və daxili siyasət nəticəsində qazandığınız nailiyyətlərə və qələbəyə görə Sizi təbrik edirik. Biz Sizinlə fəxr edirik. Allah bütün işlərinizdə Sizə kömək olsun. Uğurlarımızın, qələbələrimizin sayı çox olsun.

Xalqımız kimi biz cəlilabadlılar da həmişə Sizinləyik.

X X X

Hörmətlə,
Nağdızadə Həsən Maqsud oğlu.
Azərbaycan Respublikası, Cəlilabad rayonu.

Hörmətli cənab Prezident!

Bir Azərbaycan vətəndaşı olaraq bu məktubu ailəm adından Sizə yazmağı özümə borc bildim.

Güclü iqtisadiyyatı və yüksək mədəniyyəti ilə öyünən, başqalarına dərs keçməyə çalışan dünya ölkələrinin hazırda düşdüyü vəziyyəti, onlarda yaşanan böhranı, əhaliyə qarşı törədilən vəhşilikləri görəndə insanlarda fərqli düşüncələr yaranır. Düşünürəm ki, həmin ölkələr Azərbaycanda yaradılan əmin-amanlıqdan, sabitlikdən nümunə götürsələr, dərs çıxarsalar daha yaxşı olardı.

Möhtərəm Prezident, xalqımıza göstərdiyiniz diqqətə, insanların gözəl və firavan yaşayışının təmin edilməsinə görə Sizə minnətdarlığımızı bildirir, uzun ömür, möhkəm cansağlığı arzu edirik. Biz Sizin üçün Allaha həmişə dua edirik.

Hörmətlə,
İmanov Yamən Xosrov oğlu.
Azərbaycan Respublikası, Tərtər rayonu, Qaynaq kəndi.

X X X

Cənab Ali Baş Komandan!

Aprelin 2-də baş verən hadisələr bizim çoxdan gözlədiyimiz və düşmənimiz ermənilərə verilmiş layiqli cavabdır. Allah bu əməliyyat zamanı şəhid olan əsgərlərimizə rəhmət eləsin. Vətən sağ olsun!

Hörmətli cənab Prezident, biz daim Sizinləyik, Sizə - Ali Baş Komandanımıza inanırıq. Əminik ki, Sizin rəhbərliyinizlə qısa müddətdə torpaqlarımız işğaldan azad ediləcək. Bunun üçün əmrinizi gözləyirik.

Hörmətlə,
Mehdiyev Ənvər Məcid oğlu.
Azərbaycan Respublikası, Bakı şəhəri.

X X X

Hörmətli cənab Prezident!

Cəbhədə baş verən son hadisələrlə bağlı onu bildirmək istəyirəm ki, Vətənimizin keşiyində durmağa, onun uğrunda canımı fəda etməyə həmişə hazıram. Torpaqlarımızı azad etmək üçün əmrinizi gözləyirik.

Biz Sizin siyasətinizi tam olaraq dəstəkləyirik. Allah Sizə möhkəm cansağlığı versin.

Dərin hörmətlə,
Qəribov Emin Rizvan oğlu.
Azərbaycan Respublikası, Bakı şəhəri.

X X X

Cənab Ali Baş Komandan İlham Əliyev!

Ermənistan-Azərbaycan qoşunlarının təmas xəttində baş vermiş silahlı toqquşmalar nəticəsində həlak olmuş həmvətənlərimizin doğmalarına və Sizə 75 min üzvü, 95 illik tarixi olan və 25 ildir ki, QHT kimi fəaliyyət göstərən Azərbaycan Respublikası Qadınlar Cəmiyyəti adından başsağlığı verir, hər zaman yanınızda olacağımızı və Sizə dəstəyimizi əsirgəməyəcəyimizi bildiririk.

Dərin hörmətlə,
Qasımova Bahar Komandir qızı.
Azərbaycan Respublikası, Bakı şəhəri.

X X X

Hörmətli cənab Prezident!

Sizi səmimi qəlbdən salamlayıram. Mən müxalifətyönlü gənc olaraq Sizinlə qürur duyuram. Aprelin 1-2-də cəbhədə baş verən savaşla bağlı bildirirəm ki, mən Sizin siyasətinizi dəstəkləyirəm. Bir gənc olaraq Vətənimizin ərazi bütövlüyü uğrunda mübarizədə iştirak etməyə hazıram. Ürəyim qürur hissi ilə döyünür, fikirlərimi sözlə ifadə etməkdə çətinlik çəkirəm. Bu gündən etibarən Sizi dəstəkləyirəm, Sizinlə fəxr edirəm.

Allah Sizi bizim millətə çox görməsin!

Hörmətlə,
Kazımov Nəvai Kərimbala oğlu.
Azərbaycan Respublikası, Sumqayıt şəhəri.

X X X

Möhtərəm cənab Prezident!

2016-cı il aprelin 1-dən 2-nə keçən gecə azğın ermənilərin xislətlərinə xas olaraq xaincəsinə mövqelərimizə hücum etməsi bizi çox həddətləndirmişdir.

Sizin rəhbərliyinizlə rəşadətli Ordumuz düşmənin layiqli cavabını verdi. Biz hər zaman Sizinləyik! Biz hər zaman ordumuzlayıq! Hər an əmrinizi gözləyirik, cənab Prezident! Uca Tanrı Sizi və xalqımızı qorusun. Allah şəhidlərimizə rəhmət eləsin.

Hörmətlə,
Quliyev Azadi Sabir oğlu.
Azərbaycan Respublikası, Bakı şəhəri.

X X X

Möhtərəm cənab Prezident!

Ötən günlərdə cəbhədə baş verən döyüşlərdə şəhid olan qəhrəman əsgərlərimizə Allahdan rəhmət diləyirəm. Mən fəxr edirəm ki, Sizin yürütdüyünüz siyasət nəticəsində güclənən Azərbaycan Ordusu düşmənə layiqincə cavab verdi. Bu, atəşkəsdən sonra Azərbaycan Ordusunun düşmən üzərində çox qüdrətli qələbəsidir. Ermənistan bilməlidir ki, Azərbaycanın müdrik Ali Baş Komandanı var, Azərbaycan Ordusu düşmənin hər bir təxribatının qarşısını almaq və ona layiqli cavab vermək gücünə malikdir. Mən bir azərbaycanlı olaraq buna görə fəxr edirəm.

Cənab Prezident, Sizə Allahdan uzun ömür, möhkəm cansağlığı, işlərinizdə uğurlar arzulayıram.

Hörmətlə,
Əliyev Rahim Əmrullah oğlu.
Azərbaycan Respublikası, Zaqatala rayonu, Gözbarax kəndi.

X X X

Hörmətli cənab Prezident!

Sosial şəbəkərlərdə yazılanları oxuyandan sonra Sizi, bütün Azərbaycan xalqını ilk qələbə münasibətilə ürəkdən təbrik edirəm. Əllərimi Allahın dərgahına qaldırıb bütün bəşərə məlum olan adlarına Sizi və bütün Azərbaycan əsgərlərini qoruması üçün dua etdim, edirəm və edəcəyəm. Allahın bütün bəşərə məlum olan adları Sizi və bütün Azərbaycan əsgərlərini bəlalardan qorusun, amin! Sizə və Ordumuza yeni qələbələr diləyirəm.

Hörmətlə,
Vəliyeva Ofelya İnqlab qızı.
Azərbaycan Respublikası, Gəncə şəhəri.

X X X

Əziz Prezident və Ali Baş Komandan!

Biz, Nijni Novqorodda yaşayan azərbaycanlılar cəbhədəki vəziyyətə görə narahatıq və Qarabağ münaqişəsinin tezliklə həll olunacağını gözləyirik. Öz növbəmizdə bildiririk ki, torpaqlarımızın müdafiəsinə qalxmaq üçün Sizin əmrinizi gözləyirik.

Yaşasın Azərbaycan və dəyərli Azərbaycan xalqı!

Həlak olmuş qəhrəmanlarımıza görə kədərlənirik. Azərbaycanın igid oğullarına eşq olsun!

Hörmətlə,
Bağırov Elman.
Rusiya Federasiyası, Nijni Novqorod şəhəri şəhəri.

X X X

Çox hörmətli cənab Prezident Ilham Əliyev!

Biz Ali Baş Komandan kimi Sizin etrafınızda sıx birləşib torpaqlarımızı azad etməyə var qüvvəmizlə hazırıq. İnşallah, həmin gün çox yaxındadır. Düşmənə macal verməməliyik. İşğal altındakı torpaqlarımızı azad etməliyik. Biz Sizin ətrafınızda yumruq kimi sıx birləşmişik. Biz Sizin əmrinizi gözləyirik, cənab Ali Baş Komandan! Şəxsən mən özüm torpaqlarımızın azadlığı uğrunda mübarizəyə qoşulmağa hər an hazıram. Yetər ki, Siz əmr edəsiniz. Allah Sizi qorusun.

Hörmətlə,
Mürsəlov Rəşad Nizami oğlu.
Azərbaycan Respublikası, Sumqayıt şəhəri.

X X X

Cənab Ali Baş Komandan!

Rəhbərliyinizlə Ordumuzun Qarabağ müharibəsində möhtəşəm qələbəsi münasibətilə Sizi təbrik etmək istəyirəm. Siz doğrudan da Ulu Öndərimizin siyasətinin layiqli davamçısı olduğunuzu bir daha sübut etdiniz. Siz Azərbaycanı da, Ordumuzu da inamla gücləndirdiniz. Bu qələbənin arxasında məhz həmin güc dayanır.

Ümidvaram ki, növbəti qələbəmizi Şuşada qeyd edəcəyik!
Əziz Prezidentim, Allah Sizi qorusun. Mən sizinlə fəxr edirəm.

Hörmətlə,
Əmrahlı Nəbi Rəsul oğlu.
Azərbaycan Respublikası, Sumqayıt şəhəri.

X X X

Çox hörmətli cənab Ali Baş Komandan İlham Əliyev!

Mən fiziki sağlamlığını Qarabağ müharibəsində itirmiş 2–ci qrup əliləm. Ordumuzun düşmən üzərində bu günlərdəki qələbəsi müharibə veteranı kimi məni çox sevindirdi. Bu qələbə münasibətilə Sizi – Ali Baş komandanımı ürəkdən təbrik edirəm. Əlil olmağıma baxmayaraq, hər an torpaqlarımızın azadlığı uğrunda döyüşməyə hazıram. Şəhidlərimizə Allahdan rəhmət diləyirəm. İnşallah, qüdrətli Ordumuz onların qanını yerdə qoymayacaq, torpaqlarımızı yağı düşməndən təmizləyəcək.

Sizə möhkəm cansağlığı və yeni qələbələr arzu edirəm.

Dərin hörmətlə,
Qasımov Kamandar İdris oğlu.
Azərbaycan Respublikası, Bakı şəhəri, Binəqədi rayonu.

X X X

Hörmətli cənab Prezident!

Sizin Azərbaycan dövlətçiliyinin möhkəmləndirilməsi, ölkəmizin iqtisadi, siyasi və hərbi qüdrətinin artırılması istiqamətində həyata keçirdiyiniz islahatlar gözəl bəhrələr verir və bu, bizi ürəkdən sevindirir. Son günlər Ordumuzun cəbhə bölgəsində qazandığı qələbəyə görə Sizə - Ali Baş Komandanımıza dərindən təşəkkür edirəm. Hər bir Azərbaycan vətəndaşı kimi mən də Sizinlə fəxr edirəm. Ordumuzun cəbhədəki uğurları Azərbaycanın qüdrətinin göstəricisidir. Biz Prezidentimizlə fəxr edirik, hər zaman Sizin və dövlətimizin əsgəriyik.

Hörmətlə,
Bayramov İmdad Mustafa oğlu.
Azərbaycan Respublikası, Bakı şəhəri, Binəqədi rayonu.

X X X

Əziz Azərbaycan xalqı və hörmətli cənab Prezidentim!

Bu gün Türkiyə mediasındakı xəbərlərdə azərbaycanlı qardaşlarımın erməni mənfurları tərəfindən şəhid edildiklərini oxudum. Allah onların yerini cənnətlik etsin. Başımız sağ olsun.

Türkiyədə də eyni acını yaşayırıq. PKK quldurlarının əməlləri nəticəsində kədərimiz eynidir. Allahdan arzu edirəm ki, Türkiyə və Azərbaycan xalqına ziyan dəyməsin. Ailəm, Afyonkarahisar əhalisi və Türkiyə olaraq qardaşlarımızın yanındayıq. Erməni quldurlarına qarşı mübarizədə daim Sizinləyik. Allah erməni və PKK quldurlarını məhv etsin. Biz Sizə qardaş Azərbaycanın ərazi bütövlüyü və suverenliyi uğrunda mübarizədə uğurlar diləyirik.

Allaha əmanət olun. Azərbaycanlı qardaşlarıma salamlar.

Hörmətlə,
Şenol İbrahim Xəlil İbrahim oğlu.
Türkiyə Respublikası, Afyonkarahisar şəhəri.

X X X

Məktubuma ulu öndər Qazi Mustafa Kamal Atatürkün dediyi “Nə mutlu türkəm deyənə” sözləri ilə başlamaq istəyirəm.

Biz ulu öndər Heydər Əliyevin dediyi kimi “Bir millət, iki dövlət” olaraq bütün məsələlərdə daim bir yerdəyik. Xain ermənilərə lazımi dərsi verəcəyinizə əminik. Şəhid qardaşlarımıza rəhmət, ailələrinə başsağlığı diləyirəm.

Hörmətlə,
Karacan Hakan.
Türkiyə Respublikası, Antalya şəhəri.

X X X

Hörmətli Prezident İlham Əliyev!

Əvvəla, həlak olmuş şəhid qardaşlarımızla əlaqədar Sizə başsağlığı diləyirəm. İnşallah, yerləri cənnətlik olar.

Şəxsən mən özüm hər zaman yanınızda olduğumu bildirmək istəyirəm. Erməni namərdlərinə qarşı bütün imkanlarımla döyüşmək üçün bir çağırışınız kifayət edər.

Hörmətlə,
Coşan Mehmetəli Mustafa oğlu.
Türkiyə Respublikası, Ankara şəhəri.

X X X

Hörmətli cənab Prezident!

Sizin Amerika Birləşmiş Ştatlarına səfərinizin nəticələri bizi çox qürurlandırdı. Dövlətimizə və xalqımıza göstərdiyiniz diqqət və qayğıya görə Sizə dərin minnətdarlığımızı bildiririk. Əminik ki, işğal altındakı Dağlıq Qarabağımız düşmən tapdağından uğurlu siyasətiniz sayəsində azad ediləcək. Bugünlərdə Ordumuzun qələbəsi bunu deməyə əsas verir. Biz Sizinlə fəxr edirik. Sizin rəhbərliyiniz altında dövlətimizin gündən-günə dünya miqyasında daha çox uğurlar əldə etməsi xalqımız üçün qürurverici bir faktdır.

Cənab Prezident, Sizə dərindən təşəkkür edir, dövlətimə hər zaman şərəfli və yararlı şəxsiyyət olacağıma söz verirəm.

Hörmətlə,
Əsgərova Gülnar Nizami qızı.
Azərbaycan Respublikası, Bakı şəhəri.

X X X

Hörmətli cənab Prezident İlham Əliyev!

Allah Sizin və soydaşlarımızın yardımçısı olsun. Ali Baş Komandan kimi Sizin rəhbərliyinizlə Azərbaycan Ordusunun cəbhədə uğurları bizi çox sevindirir. Mən doğma qardaşlarım azərbaycanlılarla birlikdə cəbhədə düşmənə qarşı döyüşməyə hər an hazıram. Əmin ola bilərsiniz ki, Türkiyədə mənim kimi düşünən milyonlarla soydaşınız var. Allah yardımçınız olsun.

Hörmətlə və sevgilərlə,
Yıldırım Ferdi İlyas oğlu.
Türkiyə Respublikası, İstanbul şəhəri.

X X X

Çox hörmətli Prezident İlham Əliyev!

İşğalçı Ermənistan ordusuna qarşı döyüşlərdə şəhid olan qardaşlarımıza Allahdan rəhmət diləyirəm. Sizə və Azərbaycan xalqına dərin hüznlə başsağlığı verirəm.

Bizim canımızla, qanımızla daim azərbaycanlı qardaşlarımızın yanındayıq. Biz “Bir millət, iki dövlət” olaraq daim sizinləyik. Qadir Allah gücünüzə Sizi qorusun, düşmən üzərində qələbədə Sizə güc və inam bəxş etsin.

Hörmətlə,
Bütün Fuat Qərib oğlu.
Türkiyə Respublikası, Malatya şəhəri.

X X X

Hörmətli cənab Prezident.

Mən Azərbaycan əsilliyəm. Adım Günay Aytandır. İğdırlıyam, lakin hazırda İstanbulda yaşayıram.

Ermənistan ilə müharibədə qardaşlarımın yanında olmaq, onlarla birlikdə torpaqlarımızı işğaldan azad etmək istəyirəm. Azərbaycan Ordusunun son günlərdə düşmən üzərində qələbəsi məni çox sevindirdi. Mən də Sizin Ali Baş Komandanlığınız altında ön cəbhədə düşmənə qarşı döyüşlərdə iştirak etmək istəyirəm.

Hörmətlə,
Aytan Günay Səfəralı oğlu.
Türkiyə Respublikası, İstanbul şəhəri.

X X X

Hörmətli cənab Prezident.

Qardaş Azərbaycanın işğal altındakı torpaqlarını düşməndən təmizləmək istiqamətində son günlərdə uğurla keçirilən əməliyyatlar məni çox sevindirir. Mən də Azərbaycan Silahlı Qüvvələrinin tərkibində düşmənə qarşı vuruşmaq istəyirəm. Odur ki, məni də əsgər almağınızı xahiş edirəm. Mən qardaş Azərbaycanın ərazi bütövlüyü uğrunda mübarizənin ön sıralarında olmaq istəyirəm. Müqəddəs Vətənin ərazi bütövlüyü uğrunda döyüşlərdə qardaşlarıma hünər və rəşadət arzu edirəm. Azərbaycanın qələbəsinə ürəkdən inanıram.

Hörmətlə,
Yakup Çalık.
Türkiyə Respublikası, Əskişəhər şəhəri.

X X X

Çox hörmətli cənab Prezident.

Qardaş Azərbaycan Ordusunun son günlərdə düşmən üzərində qələbəsi bizi çox sevindirir. Vətənin ərazi bütövlüyü uğrunda mübarizədə şəhid olmaq şərəfdir. Şəhidlərimizə Uca Allahdan rəhmət diləyir, Sizə və qardaş Azərbaycan xalqına dərin hüznlə başsağlığı verir, canlarını Vətən uğrunda qurban verənlərin yaxınlarına səbir diləyirəm. Türkiyə vətəndaşı olaraq qardaş Azərbaycana maddi və mənəvi dəstəyimizin əbədi olduğunu bildirmək istəyirəm.

Hörmətlə,
Aydın Faruk İbrahim oğlu
Türkiyə Respublikası, Konya şəhəri

X X X

Salam hörmətli cənab Prezident.

Mən Vətəndən uzaqda yaşayıram. Könüllü olmaq və ölkəmi müdafiə etmək istəyirəm. Könüllü kimi mənim namizədliyimi nəzərdən keçirməyi xahiş edirəm, çünki Azərbaycanın ərazi bütövlüyünü müdafiə etmək mənim üçün böyük şərəfdir.

Hörmətlə,
Seymur Babayev
Belarus Respublikası, Jlobin şəhəri