FETÖ-nün qorxunc Azərbaycan planı – MƏXFİ YAZIŞMALAR

FETÖ terror təşkilatının rəhbəri Fətullah Gülənlə bağlı "Wikiliks" yazışmaları ortaya çıxıb.

Publika.az xəbər verir ki, ABŞ Mərkəzi Kəşfiyyat İdarəsinin (CİA) "kölgəsi" hesab olunan "Stratfor" beyin mərkəzinin rəsmilərinin "Wikiliks"də yayımlanan yazışmalarında deyilir.

Reva Bhallanın "Stratfor"a göndərdiyi 22 mart 2010-cu il tarixli analizdə camaatdan ayrılmış adı açıqlanmayan keçmiş bir müridin etiraflarına yer verilir. Liseydə camaata qoşulan və camaatın əmri ilə ABŞ-a gələn keçmiş mürid özünün Türk Silahlı Qüvvələrinə soxulduğunu etiraf edir. Keçmiş mürid Gülən haqda məlumatlara və hərbi sirlərə vaqif olduğu üçün camaatın onun üstünə gələ bilmədiyini, lakin mütəmadi olaraq yoxlanıldığını açıqlayır.

Mürid Türkiyənin hər şəhərində olan FETÖ-çü polislərin, eyni zamanda Azərbaycan və Türkmənistandakı fəaliyyətə də nəzarət etdiyini qeyd edir. Ankaradakı FETÖ-çü iş adamlarının Azərbaycan və Türkmənistandakı şəbəkənin fəaliyyətini maliyyələşdirdiyi bildirilir.

2014-cü ildə yayılan bu yazışma FETÖ terror təşkilatının Azərbaycana da sızdığını göstərir. Hazırda rəsmi şəkildə terror təşkilatının təmizlənmə prosesi başlayıb. "Azadlıq" qəzetinin maliyyə direktoru Faiq Əmirli məhz FETÖ təşkilatına bağlı olmaq ittihamı ilə həbs olunub.

AXCP sədri Əli Kərimlinin FETÖ lideri Fətullah Gülənlə bağlantılarına dair informasiyalar da yayılıb.

"Azərbaycanda 2003-cü il prezident seçkiləri zamanı fətullahçılar Əli Kərimlinin daxil olduğu seçki ittifaqına gizli dəstək veriblər. Məhz 2005-ci ildə Azərbaycanda hazırlanan çevriliş cəhdinin müəlliflərindən biri FETÖ olmuşdur. Bu məqsədlə də Rəsul Quliyev-Əli Kərimli-Fərhad Əliyev qruplaşmasına dəstək vermiş, "narıncı inqilab"ın Qərbdəki ideoloji mərkəzləri ilə çevrilişçilər arasında vasitəçi rolunu oynamışdır. 2009-cu ildə isə Türkiyə-Ermənistan sərhədlərinin açılmasına nail ola bilməyən Fətullah Gülən Azərbaycan ictimai rəyini gələcəkdə buna hazırlamaq üçün Ə. Kərimlidən maddi-mənəvi yardımını əsirgəməyib", - deyə yayılan məlumatların birində deyilir.

Bu məlumatları "Wikiliks"in iki il öncə yaydığı yazışmalar fonunda dəyərləndirərkən, FETÖ-nün Azərbaycana dair planlarının olduğu aydın şəkildə görünür.

Asif