"Ukraynada baş verən hadisələr Azərbaycan üçün nümunə ola bilməz"

“Deputatların toxunulmazlığı məsələsi dünyanın əksər dövlətlərində tətbiq olunur. Bu, Azərbaycanın icad etdiyi bir yenilik deyil”.

Bunu Publika.az-a açıqlamasında Milli Məclisin deputatı Elman Nəsirov deyib.

Millət vəkili bildirib ki, dünyanın bütün sivil ölkələrində deputatların toxunulmazlıq hüququna malik olma yanaşması var: “Yəni xalqın seçdiyi nümayəndələr toxunulmazlıq hüququna malikdirlər. Bu da onların xalqın mənafeyini müdafiə etmək işində mövqelərini möhkəmləndirən amil kimi qəbul olunub. Son zamanlar Ukraynada deputat toxunulmazlığının ləğvi gündəmə gəlib. Əvvəla, onu qeyd edim ki, bu Ukraynanın düşdüyü mövcud siyasi reallıqlardan qaynaqlanan məsələdir. Ukraynada artıq hakimiyyət dəyişikliyi baş tutub və Poroşenkonu Zelenski əvəzləyib. Onun fəaliyyətində diqqətdən yayınmayan cəhət odur ki, Zelenski köhnə hakimiyyəti korrupsiya, rüşvətxorluq kimi ağır cinayətlərdə ittiham edir. Nəzərə alsaq ki, yeni prezidentin ittiham etdiyi şəxslərin çoxu deputatdır, hətta Poroşenkonun özü də deputatdır, belə olan halda, onlara cinayət işi açmaq mümkün deyil. Zelenskinin fikrinə görə, bu insanlar cinayət törədiblər. Ukraynanın milli dövlətçiliyinin əleyhinə fəaliyyət göstəriblər. Lakin onların toxunulmazlığı olduğuna görə, cinayət məsuliyyətinə cəlb etmək olmur. Bu reallığın diktəsi altında Ukrayna prezidenti deputatların toxunulmazlığının ləğv edilməsi təklifini irəli sürüb. Bu istiqamətdə də ciddi işlər görülməkdədir. Lakin bu o demək deyil ki, bu vəziyyət başqa ölkələr üçün nümunə olmalıdır. Azərbaycana gəldikdə, bu məsələ ölkəmizdə müzakirə predmeti deyil. Çünki Azərbaycanın 90-cı illərin əvvəllərində keçdiyi mübarizə yolunu Ukrayna bu gün keçməkdədir. Biz bütün o məhrumiyyətləri həmin dövrdə yaşamışıq. Buna görə də bu gün Ukraynada baş verən hadisələr Azərbaycan üçün nümunə ola bilməz”.