Ermənistanın müharibəni davam etdirmək üçün iqtisadi gücü yoxdur - Deputat

“Müasir dövrdə müharibə aparmaq həm də iqtisadi gücə və imkanlara əsaslanır. Təbii ki, döyüş meydanında əsgərin gücü, ruh yüksəkliyi, texnika və texnologiyanın varlığı və ondan istifadə vərdişləri, komandanlığın döyüşü planlaşdırmaq bacarığı həlledici rol oynayır. Bunlarla yanaşı, təchizat, maliyyə imkanları, iqtisadiyyatın dözümlülüyü müharibə aparan tərəfin qələbəsini təmin edən əsas amillərdəndir”.

Bu sözləri Publika.az-a açıqlamasında Milli Məclisin deputatı Tahir Mirkişili deyib.

O qeyd edib ki, Ermənistran rəhbərliyi döyüş başlayan gündən bütün səylərini döyüşü dayandırmağa yönəldib. Müxtəlif olkələrin rəhbərlərinə zəng edən Ermənistan baş naziri onlardan Azərbaycanın əks-hücumunu dayandırmağı xahiş edir.

Deputat Ermənistanın hansı səbəbdən döyüşün dərhal dayandırılmasını xahiş etdiyinə aydınlıq gətirib: “Artıq 4-cü gündür davam edən vətən müharibəsində Azərbaycan Ordusu Ermənistan işğalçılarını torpaqlarımızdan çıxarmaq üçün əks-hücum əməliyyatlarına başlayıb. Bir sıra ərazilər düşməndən azad edilib. Erməni işğalçı qüvvələri bütün istiqamətlərdə ağır itkilər verməklə məğlubiyyətin hər gün yaxınlaşdığını hiss etməkdədirlər. Azərbaycan Ordusu döyüşdə ən müasir silahlarla yanaşı, müasir metodlardan da istifadə edir. Təhlillər göstərir ki, Ermənistan iqtisadi cəhətdən qısamüddətli belə döyüş aparmağa qadir deyil. Təqribi hesablamalara görə, son günlər məhv edilmiş erməni texnikalarının dəyəri artıq 1 milyard dolları keçir. Gündəlik döyüş əməliyyatlarını aparmaq milyonlarla dollara başa gəlir. Ermənistanın isə belə bir müharibəni davam etdirmək üçün iqtisadi gücü yoxdur. İqtisadi cəhətdən 3 dəfə Azərbaycandan kiçik olan Ermənistanın hərbi büdcəsi cəmi 658 milyon dollardır. Azərbaycan Ordusunun hərbi büdcəsi isə 2.3 mlrd dollar, yəni 4 dəfəyə yaxın böyükdür”.

T.Mirkişilinin sözlərinə görə, Azərbaycan iqtisadiyyatının ehtiyatları kifayət qədər böyükdür və strateji ethiyatlarımız 52 milyard dollara yaxındır ki, Ermənistanda bu rəqəm 2.6 milyard dollar təşkil edir: “Pandemiya dövrü Ermənistan iqtisadiyyatına ciddi zərbə vurub, halbuki Azərbaycan iqtisadiyyatı bu dövrdə ən az zərər görən iqtisadiyyatlardandır. Qarabağda döyüşlər başlayan kimi erməni dramının devalvasiyaya uğraması iqtisadi vəziyyətin çox gərgin olduğunu deməyə əsas verir. Digər tərəfdən, Ermənistan iqtisadiyyatının əsas gəlir mənbəyi dağ-mədən sənayesidir. Onlar dağ-mədən sənayesi ilə həm Azərbaycanın işğal olunmuş ərazilərindən, həm də dövlət sərhədinə yaxın Ermənistan ərazilərindən hasil edilən məmulatlar hesabına xeyli gəlir əldə edir. Azərbaycanın apardığı uğurlu əməliyyatlar nəticəsində hər iki ərazidə hasilat dayanıb ki, bu da Ermənistanı əsas gəlir mənbəyindən məhrum edir.

Beləliklə, Ermənistan hökuməti nə hərbi, nə də iqtisadi cəhətdən Azərbaycanla müharibə aparmaq gücündə deyil. Bunu özləri də yaxşı anlayırlar, ona görə bütün dünyaya yalvarırlar. Təhlillər Azərbaycanın şəksiz qələbəsini proqnozlaşdırır”.

Akqabay Mıradov