Böyük Ermənistan mifi  Azərbaycan Ordusu tərəfindən dağıdılır - Millət vəkili

Ermənistanın daxili siyasəti hazırda şok vəziyyətindədir. Hakmiyyət uğrunda gərgin mübarizə getsə də, Ermənistanda faktiki olaraq bütün siyasi qüvvələr Azərbaycan torpaqlarının işğalını dəstəkləyirdi. Bir-birini əvəz edən partiyalar Azərbaycan ərazi bütövlüyünü tanımaqdan imtina edirdi.

Bu sözləri Publika.az-a açıqlamasında millət vəkili Aydın Mirzəzadə deyib.

O, qeyd edib ki, hazırda onların ümumi xətti iflasa uğrayır: “Müxalif partiyalar indi Ermənistan hakimiyyətinə alternativ bir çıxış yolu təklif etməyə çəkinirlər. Uzun illər yaratdıqları böyük Ermənistan mifi Azərbaycan Ordusu tərəfindən dağıdılır. Həmçinin bu gün Ermənistan dünya tərəfindən təklənib. Daha doğrusu apardığı işğalçılıq siyasətinin beynəlxalq hüquq normalarını tapdalaması, insanlığa qarşı etdiyi digər cinayətlər dünyanın heç bir dövlətini onları dəstəkləməyə icazə vermir. Əsl faciə müəyyən müddət sonra Ermənistan orduya göndərməyə əsgər tapmayanda başlayacaq. Ermənistan idarəolunmaz bir vəziyyətə gəlib çıxacaq. Apardıqları uğursuz siyasətin acı nəticələrini dadacaqlar”.

Millət vəkilinin sözlərinə görə, Azərbaycan həqiqətləri bu gün dünya mətbuatında işıqlandırılır: “Bəzi tanınmış informasiya vasitələri hələ də Azərbaycanın haqq savaşı ilə bağlı susmağa və yaxud da yanlış informasiya verməyə çalışır. Lakin Cənab Prezidentin xarici kanallara müsahibələri öz sözünü deyir. O cümlədən, xarici jurnalistlərin cəbhə bölgəsindən hazırladığı reportajlar dünyanın gözünü açır. Bu isə həm Ermənistanı, həm də onların xaricdəki diasporasını çıxılmaz vəziyyətdə qoyur. Ermənistan özü üçün yəqin etməlidir ki, başqa xalqların torpağını, tarixini və mədəniyyətini oğurlamaq siyasəti sözsüz ki, onları bu vəziyyətə gətirib çıxartmalı idi”.

Aytən Məftun