2026-cı il üçün dolların maksimum məzənnəsi AÇIQLANDI

"Garda Kapital" şirkətinin fond bazarı üzrə eksperti Kirill Seleznyov 2026-cı ildə dolların maksimum məzənnəsinin 90 rubla çatacağını proqnozlaşdırıb.

Publika.az xəbər verir ki, ekspert bu barədə "Gazeta.Ru"ya açıqlamasında bildirib.

O deyib ki, aparıcı bankların və brokerlərin ortaq rəyinə əsaslanan baza ssenarisinə görə, ilin sonunda dolların məzənnəsi 90 rubl civarında olacaq. İlin ikinci yarısı üçün orta göstəricinin isə 85 rubl ətrafında dəyişəcəyi gözlənilir.

Seleznyov qeyd edib ki, Mərkəzi Bankın mart ayındakı sorğusunda il üzrə orta məzənnə 84 rubl olaraq proqnozlaşdırılmışdı.

“Dolların 100 rubl və daha yuxarı olması” ssenarisi isə hazırda mümkün, lakin qeyri-real və neqativ bir ssenari kimi qiymətləndirilir. Analitik bu ssenarinin baş verməsi üçün üç amilin eyni vaxtda reallaşmalı olduğunu vurğulayıb: neftin qiymətinin 60 dollardan aşağı düşməsi, ixraca qarşı yeni sanksiyalar və Mərkəzi Bankın uçot dərəcəsini 11 faizə yaxın səviyyəyə sürətlə endirməsi. Seleznyov bu üç amilin üst-üstə düşmə ehtimalının hazırda aşağı olduğunu qeyd edib.

"Investing.com"un məlumatına görə, mayın 21-də birjadankənar bazarda dollar 70 rubldan baha satılıb. Bir gün əvvəl isə Amerika valyutası 69 rubla qədər ucuzlaşmışdı.

Hüseyn İbadlı