Genişmiqyaslı əməliyyat: 8 milyard dollarlıq kriptovalyuta ələ keçirildi

ABŞ Federal Təhqiqatlar Bürosu (FTB) beynəlxalq miqyasda keçirilən irimiqyaslı əməliyyat nəticəsində rekord həcmdə – 127 min bitkoin (8 milyard dollardan çox dəyərində) ələ keçirib.

Publika.az "Fox News"a istinadla xəbər verir ki, əməliyyat fırıldaqçılıq mərkəzləri və mütəşəkkil cinayətkar dəstələrə qarşı yönəlib.

Bu nəhəng müsadirə Kambocanın "Prince Holding Group" şirkətinin rəhbəri Çen Jinin həbsi ilə bağlıdır. Ona qarşı fırıldaqçılıq və çirkli pulların yuyulması ittihamları irəli sürülüb.

FTB-nin məlumatına görə, Asiya, Afrika və Yaxın Şərqdə fəaliyyət göstərən cinayətkar şəbəkələr əsasən ABŞ vətəndaşlarını hədəf alıb. Onların arasında ABŞ hakimiyyəti tərəfindən transmilli cinayətkar təşkilat kimi tanınan "Democratic Karen Benevolent Army" qruplaşması da var.

FTB direktoru Kaş Patel bildirib ki, əməliyyatlar nəticəsində fırıldaqçılıq sxemlərində məcburi şəkildə istifadə edilən təxminən 2 min insan azad edilib, dövriyyəsi 8 milyard dollardan çox olan cinayətkar mərkəzlər ləğv olunub və 300-ə yaxın şəxs həbs edilib. Dubayda saxlanılan 275 şübhəlidən 6-sı ABŞ-yə ekstradisiya ediləcək.

Hüseyn İbadlı