Bakı keçid vermədi, Araik çadırdan çıxdı – Xankəndidə nələr baş verir?

Ermənistanın Laçın sərhəd-keçid məntəqəsində “humanitar yardım” təxribatı fonunda Xankəndidə baş verənlər maraqlıdır.

Publika.az xəbər verir ki, separatçıların “başçısı” Araik Arutyunyan “oturaq aksiyası”nı dayandırdı və iddia etdi ki, Moskvada xarici işlər nazirlərinin üçtərəfli görüşü məhz onun bu aksiyasına görə baş tutub.

Absurd iddiadır, bunun Qarabağdakı erməni əhalisinə özünü daha baha satmaq və onları nəzarətdə saxlamaq üçün ucuz siyasi gediş olduğu da məlumdur. Lakin Araikin iddiası ilə onun dəstəsinin üzvü olan qondarma “dövlət naziri” Qurgen Nersisyanın fikirləri ziddiyyət təşkil edir.

Araikin məntiqindən belə çıxır ki, Moskvada üçtərəfli görüş onun “aksiyası”na görə baş tutubsa və o, “aksiyanı” dayandırırsa, deməli görüşün nəticələri onların istəyinə uyğun olub. Halbuki, Rusiya xarici işlər naziri Sergey Lavrovun bəyanatı tamamilə Bakının gündəliyinə uyğun idi və aydın şəkildə qeyd olunurdu ki, Qarabağdakı ermənilər “milli azlıq” olaraq Azərbaycan qanunvericiliyi çərçivəsində yaşamalıdırlar.

Qurgen Nersisyanın Rusiyaya hücum çəkməsi də vəziyyətin separatçılar üçün ürəkaçan olmadığını təsdiq edir.

Nersisyan bildirib ki, Rusiyanın daim bəhanələr gətirmək və fəlakətli vəziyyətin əsaslı həllini təmin etməmək yanaşması dözülməz hal yaradıb.

“Rusiya Xarici İşlər Nazirliyinin bəyanatı Ermənistanın Azərbaycanın təklif etdiyi müzakirə mövzusu ilə razılaşdığını göstərir. Bakı-Stepanakert (Xankəndi) dialoqunun “barı” (səviyyəsi) aşağı salınıb”, - o deyib.

Göründüyü kimi, separatçılar Moskva görüşündən də heç nə əldə edə bilmədilər və bu kontekstdə Araikin “oturaq aksiyası”nı başa çatdırmasının üç mümkün səbəbi ola bilər: ya “baş separatçı” oturmaqdan yoruldu, ya heç bir nəticə əldə edə bilmədiyini anladı, ya da elə onun “oturduğu” yerdən qalxması, girdiyi çadırdan çıxması göstərişini elə Rusiyanın özü verib.

Separatçılar çıxılmaz vəziyyətə düşüb, onların Rusiyaya hücum etməsi də bunun bariz nümunəsidir. Ermənistanın Laçın postunun qarşısına yük maşınlarını toplamasına ümid edirlər və düşünürlər ki, bu, Bakıya beynəlxalq təzyiqin edilməsinə səbəb olacaq, nəticə etibarilə Laçın yolu açılacaq. Lakin Bakının qəti mövqe sərgiləməsi onların bu ümidlərini də puça çıxarır.

Asif