Vardanyan “sosial yeməkxana”sına ərzağı haradan alır? - ŞOK FAKTLAR

Qarabağda separatçıların “aclıq şousu” davam edir. Separatçılar beynəlxalq ictimaiyyəti hər vəchlə inandırmağa çalışırlar ki, Qarabağda yaşayan ermənilərin ərzaq ehtiyatı tamamilə tükənib, guya insanlar acından ölmək təhlükəsi ilə üz-üzədirlər.

Amma hər gün də sosial şəbəkələrdə Xankəndidəki təmtəraqlı toylardan video və şəkillər paylaşmaqla özlərini biabır edirlər.

Sadə erməniləri girov saxlayan Ruben Vardanyan da Xankəndidə növbəti şou gerçəkləşdirir. O, Xankəndidə “xeyriyyə yeməkxanaları” açıb və bu gündən fəaliyyətə başlayıb. Orada hamilə qadınlar, 16 yaşınadək uşaqlar və 65 yaşdan yuxarı insanlar yemək yeyə bilərlər. Vardanyan bildirib ki, “sosial yeməkxana” xeyriyyə proqramı qida ilə bağlı çətinlikləri yüngülləşdirmək məqsədi daşıyır və ehtiyacı olanlara gündə bir dəfə yemək imkanı təklif edir.

Vardanyan iddia edir ki, insanlar evlərində yağ, şəkər, ət, kartof tapa bilmirlər. Guya Azərbaycanın blokadası nəticəsində hər şey tükənib.

Amma özünün “sosial yeməkxana”sında müxtəlif yeməklər təklif olunur. Maraqlıdır, əhalinin əksər qida ehtiyatları tükəndiyi halda, Vardanyan bu ərzaqları haradan alır? İndiyə qədər bu ərzaqları harada gizlətmişdi. Bir aydan yuxarıdır ki, “ermənilər acından ölür” deyib haray-həşir salırlar. Niyə bu ərzağı “acından ölən” ermənilərə paylamırdı? Nə əcəb onun ərzaq ehtiyatı tükənməyib, hələ üstəlik, “sosial yeməkxana” da açır?

Separatçıların, ümumiyyətlə Ermənistanın “aclıq şousu” ətrafında yaratmaq istədikləri bütün ictimai rəy beləcə faş olur. Özləri özlərini faş edirlər.