Laçının təbiətini belə dağıdırlar - ŞOK VİDEO

İllərlə 18 may tarixini hüznlə qarşılayırdıq. Çünki Azərbaycanın dilbər guşələrindən olan Laçın rayonu 1992-ci ildə Ermənistan silahlı qüvvələri tərəfindən işğal edilmişdi. 28 illik həsrətə Azərbaycan Ordusu son qoydu. İşğalçıları Laçından qovaraq bütünlükdə Qarabağı düşmən əsarətindən qurtardı.

İllərlə Laçın həsrətilə yaşayan xalqımız, nəhayət, 2020-ci ildə Qarabağı azad görmək arzusuna çatdı.

“Böyük Qayıdış” çərçivəsində 2023-cü ildə Laçın şəhərinə ilk köç başladı. Laçına köçən sakinlərin məşğulluğu üçün paralel olaraq iş yerlərinin tikintisi də aparılırdı. Belə bir deyim var “Laçının laçın vaxtları qayıtdı”.

Ancaq "əmma”lar" da peyda olmağı başladı. Laçına səfər edən şəxslər, orada məskunlaşan insanlar bu əsrarəngiz bölgənin təbiətini, ekologiyasını nəinki qoruyur, hətta onu dağıdırlar.

Publika.az xəbər verir ki, bu barədə "Mərhəmət" Kimsəsizlərə Yardım İctimai Birliyinin sədri İradə Polad sosial şəbəkədə video paylaşıb. Videodan görünür ki, istirahət edən insanlar yeyib-içdikdən sonra ərazini zibilliyə çeviriblər. Plastik qablar, yemək qırıntıları ətrafa səpələnib.

QHT sədri bununla bağlı maarifləndirmə işlərinin aparılmasının vacib olduğunu bildirib.

Deyəsən, bəzi azərbaycanlılar üçün Qarabağın alınması həqiqətən də “kefqomluq” etmək üçün əlavə məkan hesab olunur.

Kimsə kiməsə “istirahət etmə” deyə bilməz. Bu füsunkar torpaqlar bizə məxsusdur və orada istirahət etmək də hər bir azərbaycanlının haqqıdır. Amma bu yerləri qorumaq daha ümdə vəzifədir. Unutmayın, o torpaqlar qan bahasına alınıb.

Həmin videonu təqdim edirik: