Bu gücün qarşısında heç bir düşmən dayana bilməz - Sabiq səfir

“Azərbaycan Silahlı Qüvvələri dünya hərb tarixində bir ilkə imza atmağı bacarıb. Xankəndi bölgəsində Azərbaycan üçün təhlükə yaradan terror mərkəzlərini lokal xarakterli antiterror tədbirlərlə 23 saat 48 dəqiqə ərzində məhv etdi”.

Bu sözləri Publika.az-a açıqlamasında Türkiyənin Azərbaycandakı sabiq səfiri, “İMZA” İctimai Birliyinin Türkiyə Nümayəndəsi Hulusi Kılıç deyib.

O qeyd edib ki, müddət, dəqiqlik və nizam-intizamı baxımından antiterror tədbirləri dünyada keçirilmiş nümunəvi hərbi əməliyyatdır:

“Antiterror tədbirləri nəticəsində mülki infrastruktur və dinc əhali arasında heç bir itki olmadı. Birinci Qarabağ müharibəsi zamanı Azərbaycan vətəndaşları təhdid altında öz evlərini tərk etmək məcburiyyətində qaldılar və heç bir əşyalarını götürmədən öz yurdlarından didərgin düşdülər. Buna baxmayaraq, Azərbaycan Prezidenti və xalqının səxavəti sayəsində heç bir erməni vətəndaşının əmlakına toxunulmadı. İstədikləri qədər əşyalarını götürüb, bizim torpaqlarımızdan getdilər. Ermənilər Azərbaycan vətəndaşlığını qəbul edib, azərbaycanlılarla birgə qala bilərdilər. Onlara bu hüquq da verilmişdi”.

Sabiq səfir diqqətə çatdırıb ki, Azərbaycan Ordusu 44 gün davam edən Vətən müharibəsindən sonra çox fərqli orduya çevrildi:

“Belə ki, həmin dövr ərzində böyük təcrübə qazandı. Hazırda Azərbaycan Ordusu bölgənin ən güclü ordusudur. Güclü bir ordu dünyada görülməyən bir ilkə imza atdı. 23 saat ərzində ərazi bütövlüyünü və suverenliyini təmin etdi. Azərbaycan Ordusu hər il daha da inkişaf edir. Prezidentin söylədiyi kimi, Azərbaycan Ordusu Türkiyə ordusunun kiçik modelidir. İki ölkənin ordusu daim birlikdə təlimlər keçirir, gücünə güc qatır. Güclü dövlətdə güclü ordu və lider olur. Güclü xalqın isə güclü ordusu olur. Bu qədər gücün qarşısında heç bir düşmən dayana bilməz”.

Aysel Şahmar