Mübariz İbrahimovun ad günü qeyd edildi

Azərbaycanın Milli Qəhrəmanı Mübariz İbrahimov adına Biləsuvar Lisey-Məktəb Kompleksində Milli Qəhrəmanın ad gününə həsr edilmiş tədbir keçirilib.

Ombudsman Aparatından Axar.az-a verilən məlumata görə, tədbirdə Biləsuvar rayon icra başçısının müavini Xəyalə Qəmbərova, Ombudsman Aparatının şöbə müdiri Faiq Ağayev, Aparatın cənub regional mərkəzinin rəhbəri Ziya İsmayılov, Müvəkkilin uşaq hüquqları üzrə resurs mərkəzi olan Azərbaycan Uşaq və Gənclərin Sülh Şəbəkəsi və bu təşkilatın nəzdindəki Liderlik məktəbinin yeniyetmələri, liseyin kollektivi və rayon ictimaiyyətinin nümayəndələri iştirak ediblər.

Tədbirdə çıxış edən Ombudsmanın nümayəndələri Azərbaycanın tarixən öz qəhrəmanları ilə seçildiyini, ad günü qeyd edilən Mübariz İbrahimovun da qanında-canında qəhrəmanlıq, mübarizlik hissi olduğunu bildirmişlər. Öz şücaəti ilə ömrünün gənclik çağında tarixə və yaşıdlarının qəlbinə adını yazmış qəhrəmanın ölməzlik qazandığı, nəhayətsiz vətən sevgisinin onu şəhidlik zirvəsinə ucaltdığı nəzərə çatdırılmışdır. Bu igid gizirin göstərdiyi rəşadətin ölkə Prezidenti, Ali Baş Komandan İlham Əliyev tərəfindən yüksək dəyərləndirildiyi, ölkəmizin müstəqilliyinin və ərazi bütövlüyünün qorunub saxlanılmasında müstəsna xidmətlərinə görə Milli Qəhrəman adına layiq görüldüyü vurğulayıblar.

Qeyd edilib ki, Müvəkkil gənclərlə, həmçinin hərbi qullluqçularla görüşlərində hər zaman Mübariz İbrahimovun qəhrəmanlığından danışır, onun vətənin keşiyində duran əsgər və zabitlər üçün canlı örnək olduğunu qeyd edir, öz şəxsi nümunəsi ilə böyüməkdə olan nəslin vətənpərvərlik ruhunda tərbiyələnməsinə, yurdumuzun müdafiəçilərinin döyüş ruhunun, əzmkarlığının artmasına töhfələr verdiyini diqqətə çatdırır, onun valideynləri ilə ünsiyyət saxlayır.

Uşaq hüquqları üzrə resurs mərkəzi olan Azərbaycan Uşaq və Gənclərin Sülh Şəbəkəsinin üzvləri şəhidin adını daşıyan Lisey-məktəb kompleksinin şagirdləri ilə birlikdə qəhrəmana həsr olunmuş şeirlər, hekayələr söyləmiş, ədəbi-bədii kompozisiyalarla çıxış ediblər. Liderlik məktəbi çərçivəsində keçirilən növbəti görüşün bu əlamətdar tarixə həsr ediləcəyi diqqətə çatdırılıb.

Tədbir çərçivəsində həmin Lisey-Məktəbə şagirdlərin qəbulu mərasimi keçirilib, dövlət himni sədaları altında dövlət bayrağımız qaldırılıb, qəbul olunan uşaqlar and içiblər.

Ombudsmanın nümayəndələri daha sonra Şəbəkənin üzvləri ilə birlikdə şəhidin doğulduğu Əliabad kəndində onun ailəsini ziyarət edib, valideynləri, yaxınları ilə görüşüb, ev muzeyində olublar.