Lənkəranlıları zəhərləyən SƏBƏB TAPILDI

Səhiyyə Nazirliyi tərəfindən Lənkəranın Daştatük kəndində 56 nəfərin zəhərlənməsinin səbəbi öyrənilib.

Səhiyyə Nazirliyinin Gigiyena və Epidemiologiya Mərkəzinin Qidalanma gigiyenası bölməsinin müdiri İmran Abdullayev Publika.az-a bildirib ki, analizlərin nəticəsi təxmin edildiyi kimi olub.

Əhalinin kütləvi zəhərlənməsinə səbəb içməli suyun tərkibindəki salmonella bakteriyaları olub: "Kənddə su kimi istifadə edilən bulağa əlavə su xətti birləşdirilib. Həm bulağa qoşulan ikinci bulağın suyunda, həm də qusuntu nümunələrində salmonella bakteriyaları aşkarlanıb. Kənddəki birinci bulaqda heç bir bakteriya aşkarlanmayıb. Əsas səbəb qoşulan ikinci bulaqdır. Zəhərlənmələr aşkar edilən vaxtdan sudan istifadə məhdudlaşdırılmışdı. Su boruları dezinfeksiya ediləndən sonra əhali köhnə bulaqdan istifadə edə bilər, lakin ikinci bulaqdan istifadə tamamilə qadağan edilib".

Qeyd edək ki, bir neçə gün əvvəl içməli sudan istifadə edəndən sonra kəndin 56 nəfər sakini zəhərlənmişdi. Onların əksəriyyəti 3-12 yaşlı uşaqlar idi.

Gülxar