Kliniki Tibbi Mərkəzdən yaralılarla bağlı açıqlama

Xırdalanda partlayış baş verən binanın dağıntıları altından çıxarılan 5 nəfər Kliniki Tibbi Mərkəzə gətirilib. Onlardan biri Respublika Yanıq Mərkəzinə göndərilib, 4 nəfərə isə müvafiq yardımlar göstərilir.

Bunu Publika.az-a açıqlamasında Kliniki Tibbi Mərkəzin baş həkimin müavini Adil Salahov deyib.

Onun sözlərinə görə, müalicə alanların 1-i xəstəxananın reanimasiya şöbəsinə, 2-si uşaq, 1-i isə I cərrahiyyə şöbəsinə yerləşdirilib. Xəsarət alanların 3-ü 7, 14 və 15 yaşlı uşaqdır.

“Xəsarət alanlardan 1972-ci il təvəllüdlü İsmayılova Mətanət Elbrus qızı kəllə-beyin travması, qolun, bazunun, almacıq sümüyünün, 11-ci bel fəqərəsinin sınığı, döş qəfəsinin əzilməsi ilə xəstəxanaya gətirilib. Hazırda onun vəziyyəti ağırdır.

2007-ci il təvəllüdlü İsmayılov Bəkir Vidadi oğlu bədənin çoxsaylı əzilmələri, 2010-cu il təvəllüdlü Aytac Abdullayeva bədənin küt travması ilə xəstəxananın uşaq şöbəsində yatır.

15 yaşlı İsmayıllı Aygün Vidadi qızı aşağı ətrafının didilmiş, cırılmış yarası ilə I cərrahiyyə şöbəsində müalicə alır.

2000-ci il təvəllüdlü İsmayılov Yunis Vidadi oğlunun yanıq xəsarətləri olduğu üçün Respublika Yanıq Mərkəzinə göndərilib. Hazırda müalicə alanlardan Mətanət İsmayılovanın vəziyyəti ağır, digərlərinin vəziyyəti isə kafidir”.

Gülxar