Ermənilər azərbaycanlı girovlara zülm edir

Azərbaycanın Baş nazirinin müavini Əli Həsənov hazırda ermənilər tərəfindən girovluqda saxlanılan iki azərbaycanlının və öldürülmüş azərbaycanlının meyitinin qaytarılması üçün BMT-ni və digər beynəlxalq təşkilatları Ermənistana təsir göstərməyə çağırıb.

Trend-in məlumatına görə, Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov Cenevrədə BMT-nin Qaçqınlar üzrə Ali Komissarlığı (BMT QAK) İcraiyyə Komitəsinin 65-ci sessiyasında çıxışı zamanı deyib ki, bu ilin iyulunda Dilqəm Əsgərov, Şahbaz Quliyev və Həsən Həsənov Azərbaycanın ermənilər tərəfindən işğal edilmiş Kəlbəcər rayonunda öz əcdadlarının məzarlarını ziyarət edərkən erməni tərəfi onları tutub. Onlardan biri – məcburi köçkün Həsən Həsənov girov götürülərkən öldürülüb: “Erməni tərəfi bu dinc vətəndaşları yalandan təxribat törətməkdə ittiham edir, hazırda onlar ermənilərin əlində əsirdirlər və orada qeyri-insani rəftara məruz qalırlar. Bütün bunlar beynəlxalq hüququn, o cümlədən Dördüncü Cenevrə Konvensiyasının kobud şəkildə pozulmasıdır. Biz əsirlikdə olan həmvətənlərimizin dərhal qaytarılmasını, habelə Həsənovun meyitinin bizə verilməsini tələb edirik. Biz, həmçinin BMT-ni və onun müvafiq strukturlarını, habelə başqa beynəlxalq təşkilatları Ermənistana təsir göstərməyə və yuxarıda adları çəkilən vətəndaşların qaytarılmasına kömək etməyə çağırırıq”.

Ə.Həsənov qeyd edib ki, BMT Təhlükəsizlik Şurasının dörd qətnaməsində və BMT Baş Məclisinin qətnaməsində, habelə beynəlxalq təşkilatlar tərəfindən qəbul edilmiş bir sıra sənədlərdə qeyd edildiyi kimi, azərbaycanlı qaçqınların və daxili köçkünlərin qaytarılmasına imkan yaradılması bu kateqoriyaya aid insanların hərtərəfli müdafiəsi üçün son dərəcə vacibdir.

Baş nazirin müavini bildirib ki, daxili köçkünlərin hüquqları ilə bağlı problemlərin həlli və onların müdafiəsi hərtərəfli yanaşma, o cümlədən müvafiq beynəlxalq konvensiya layihəsinin hazırlanmasını tələb edir: “Bu, həm də daxili köçkünlərin problemlərinin həllində çox mühüm addım olardı. Bu şərtlə ki, bütün tərəflər öz öhdəliklərini yerinə yetirsinlər”.