Qırmızı.az

Seysmoloji aktivlik nədən xəbər verir?

23 Fevral 2015 13:59

Bu gün ərzində ard-arda 3 zəlzələnin baş verməsi qorxulu hesab edilmir. Bu cür təkanlar gün ərzində dəfələrlə baş verir.

Bunu Publika.az-a açıqlamasında Respublika Seysmoloji Xidmət Mərkəzinin baş direktoru Qurban Yetirmişli deyib.

O, ölkənin bəzi ərazilərində seysmoloji aktivliyin artmasının normal olduğunu deyib:

“Bunlar qorxulu təkanlar deyil. Gün ərzində maqnitudası 3 baldan aşağı 10-15 təkan qeydə alınır. Bunlardan bir neçəsi hiss edilməlidir. Ötən il də Qəbələ, Zaqatalada maqnitudası 5 baldan çox olan zəlzələ olmuşdu. Kiçik Qafqaz Böyük Qafqaza doğru hərəkət edir. Buna görə də xırda təkanlar olmalıdır. Bu gün baş verən təkanlar ümumi prosesin tərkib hissəsidir. Bu cür xırda təkanlar hər zaman müşahidə edilə bilər, lakin yaxın günlərdə dağıdıcı zəlzələlər gözlənilmir”.

Qeyd edək ki, bu gün səhər saatların Qəbələ ərazisində 3.3 bal, Xəzər dənizində 3.8 bal gücündə zəlzələ olub. Üçüncü zəlzələ Şəmkir rayonu ərazisində 4 bal gücündə olub.

Gülxar