Azərbaycanda məişət zorakılığına məruz qalma vəziyyəti araşdırılır

Ailə, Qadın və Uşaq Problemləri üzrə Dövlət Komitəsi Azərbaycanda bu il ərzində məişət zəminində zorakılığa məruz qalma vəziyyətinin öyrənilməsi məqsədi ilə sorğu aparacaq.

Dövlət Komitəsinin İnformasiya və analitik araşdırmalar şöbəsinin müdiri Elgün Səfərov Trend-ə bildirib ki, bu sorğu 10 komponent üzrə aparılacaq. Sorğu zamanı məcburi selektiv abortlar, erkən nikahlar, uşaqlara qarşı zorakılıq, qadınların iş yerlərində zorakılığa məruz qalması və s. məsələlər öyrəniləcək.

E.Səfərovun sözlərinə görə, statistik məlumatlar Azərbaycanda məişət zorakılığı hallarının azaldığını, bu sahədə vəziyyətin yaxşılaşdığını göstərir. Amma bütün dünyada olduğu kimi, Azərbaycanda da məişət zorakılığı halları qeydə alınan statistik məlumatların sayından qat-qat yuxarıdır: “Bunu biz də bilirik və qəbul edirik. Reallıqda məişət zorakılığı hallarının, zərərçəkənlərin sayı daha çoxdur. Bu məsələdə problem ondadır ki, məişət zorakılığı özü latent xarakterli, yəni gizli cinayətdir. Bu o deməkdir ki, qurbanın özü məlumat verməsə, həmin zorakılıq faktı qeydiyyata alınmır”.

Komitə rəsmisi deyib ki, məişət zorakılığı ilə mübarizə sahəsində qanunvericilik islahatları, maarifləndirmə, elmi-tədqiqi araşdırmalar aparılmalıdır.