Türkiyə xüsusi təyinatlı batalyonu Kosovoya GÖNDƏRDİ

"Türkiyə Kosovoda xüsusi təyinatlılardan ibarət batalyon yerləşdirməyə başlayıb".

Publika.az xəbər verir ki, bu barədə iyunun 4-də Türkiyə Milli Müdafiə Nazirliyi "Twitter" səhifəsində məlumat yayıb .

“65-ci Mexanikləşdirilmiş Piyada Briqadasının komando batalyonunun Kosovoya yerləşdirilməsinə başlanılıb”, - məlumatda deyilir.

Bundan əvvəl Türkiyənin 4-5 iyun tarixlərində Kosovoya xüsusi təyinatlılardan ibarət batalyon göndərəcəyi barədə məlumat yayılmışdı.

Ankara Şimali Atlantika Alyansının Müttəfiq Birləşmiş Qüvvələr Komandanlığının sorğusuna cavab olaraq, əvvəllər NATO Kosovo Qüvvələrinə (KFOR) ayrılmış 65-ci Kırklareli Mexanikləşdirilmiş Piyada Briqadasının bir batalyonunun ehtiyat birlik kimi yerləşdirildiyini açıqlayıb.

Bundan əvvəl Qərb hərbi blokunun baş katibi Yens Stoltenberq Kosovodakı icma qüvvələrini dəstəkləmək üçün 700 hərbçinin göndərildiyini təsdiqləyib. O qeyd edib ki, bu, regionda böhranın sülh yolu ilə həllindən imtina demək deyil.

Hüseyn İbadlı