Doğum günü səfəri kabusa çevrildi: Tbilisi meri Əbu-Dabidə qaldı

Gürcüstanın paytaxtı Tbilisinin meri Kaxa Kaladze İrandakı vəziyyətin gərginləşməsi səbəbindən Əbu-Dabini tərk edə bilmir.

Publika.az xəbər verir ki, bu barədə yerli media məlumat yayıb.

"Şənbə və bazar günləri Tbilisi meri Kaxa Kaladze Əbu-Dabidə olub. Mövcud vəziyyətə görə, o, hazırda Gürcüstana uça bilmir", - deyə məlumatda bildirilib.

Qeyd edək ki, media orqanları bundan əvvəl Kaladzenin həyat yoldaşı ilə birlikdə ad gününü qeyd etmək üçün Birləşmiş Ərəb Əmirliklərinə səfər etdiyini bildirib. Səfər Yaxın Şərqdə vəziyyətin pisləşməsi və bəzi ölkələrin hava məkanlarını bağlaması ilə üst-üstə düşüb.

Xatırladaq ki, ABŞ və İsrail 28 fevralda İrana qarşı hərbi əməliyyata başlayıblar. Zərbələr İranın paytaxtı Tehranı və ölkənin ən böyük şəhərlərini hədəf alıb. Zərbələrdən dərhal sonra İslam İnqilabı Keşikçiləri Korpusu genişmiqyaslı cavab əməliyyatı elan edib. Məlumata görə, İran İsrail və Bəhreyn, İordaniya, Qətər, Küveyt, BƏƏ və Səudiyyə Ərəbistanındakı ABŞ hərbi bazalarına zərbələr endirib.

Adəm