İki il məzuniyyətə çıxmayanları gözləyən təhlükə - Psixoloq xəbərdarlıq etdi

Bəzən insanlar maliyyə problemləri və iş prosesinə nəzarəti itirmək qorxusu səbəbindən məzuniyyətlərini təxirə salırlar.

Publika.az xəbər verir ki, psixologiya üzrə fəlsəfə doktoru Sofya Sulim uzun müddət məzuniyyətsiz işləməyin ciddi fəsadlara səbəb ola biləcəyini bildirib.

Onun sözlərinə görə, insan altı aylıq intensiv işdən sonra əmək qabiliyyətinin əhəmiyyətli dərəcədə azaldığını hiss edir. Bir il ərzində məzuniyyət olmayanda isə artıq tükənmə prosesi başlayır.

Psixoloq qeyd edib ki, hətta müntəzəm həftəsonları belə orqanizmin tam bərpası üçün kifayət etməyə bilər. Gərginlik tədricən toplanır və bədən daha uzunmüddətli fasiləyə ehtiyac duyur. Bunun üçün mütləq uzunmüddətli səyahətə çıxmaq lazım deyil. Bir neçə gün işdən və iş tapşırıqlarından uzaq qalmaq belə insanın rahatlamasına və tükənmə riskinin azalmasına kömək edə bilər.

Mütəxəssis xəbərdarlıq edib ki, iki il məzuniyyətsiz işləmək artıq daha ciddi bərpa tələb edə bilər. Davamlı stress fonunda xroniki yorğunluq, əmək qabiliyyətinin azalması və psixosomatik problemlər yarana bilər.

Müəllif: Adəm