30 gün şirniyyatdan imtina etsəniz... - Orqanizmdə gözlənilməz dəyişikliklər

Şirniyyatdan 30 gün imtina etmək təkcə çəkinin azalmasına deyil, həm də iştahanın, ümumi əhvalın və dərinin vəziyyətinin yaxşılaşmasına səbəb ola bilər.

Publika.az xəbər verir ki, dietoloq Yelena Sebkonun sözlərinə görə, söhbət ilk növbədə əlavə şəkərin - konfet, şokolad, şirniyyat, xəmir məmulatları, desertlər və şirin içkilərin rasiondan çıxarılmasından gedir. Meyvə kimi təbii karbohidrat mənbələrindən isə tamamilə imtina etmək lazım deyil.

Mütəxəssis bildirib ki, ilk günlər şirniyyatdan imtina etmək asan olmaya bilər. Bu dövrdə aclıq hissi, əsəbilik, yorğunluq və şirin yemək istəyi arta bilər.

Bir müddət sonra isə şirniyyata olan həvəs adətən azalır. İştahanı idarə etmək asanlaşır, qəfil aclıq hissi və tez-tez qəlyanaltı etmək istəyi azalır.

Əgər rasionda əvvəllər çoxlu şirin qida və içki olubsa, onların məhdudlaşdırılması gün ərzində yuxululuq və yeməkdən sonra yaranan kəskin yorğunluq hallarını da azalda bilər.

Şirniyyatdan imtina ümumi kalori qəbulu azaldığı halda çəkinin düşməsinə də kömək edir. Bununla yanaşı, bəzi insanlarda dərinin vəziyyəti yaxşılaşa bilər.

Dietoloq vurğulayıb ki, 30 gün şirniyyat yeməmək orqanizmi “yenidən işə salmır” və toksinləri xaric etmir. Əsas məsələ şirniyyatın nə ilə əvəz olunmasıdır.

Müəllif: Adəm