Qəhvə ilə bağlı bu mif dağıldı

Müntəzəm qəhvə içməyin orqanizmdə vacib vitamin və mineralların azalmasına səbəb olduğu barədə yayılmış fikirlər tam doğru deyil.

Publika.az xəbər verir ki, bunu endokrinoloq Kseniya Verbetskaya deyib.

Onun sözlərinə görə, qəhvə dəmirin orqanizmdəki mövcud ehtiyatını “yuyub aparmır”. Lakin içkini yeməklə birlikdə qəbul etmək qidadakı qeyri-hem dəmirin sorulmasını azalda bilər. Buna görə də dəmir çatışmazlığı olan və ya dəmir preparatları qəbul edən şəxslərə qəhvəni dərmanla birlikdə içməmək və onları zaman baxımından ayırmaq tövsiyə olunur.

Mütəxəssis qeyd edib ki, kofein qısa müddət ərzində sidiklə kalsium, maqnezium və bəzi elektrolitlərin xaric olunmasını artıra bilər. Lakin normal miqdarda qəhvə qəbul edildikdə bu itkilər cüzi olur və balanslı qidalanma şəraitində, bir qayda olaraq, çatışmazlığa səbəb olmur.

Qəhvənin mütləq susuzlaşdırdığı barədə geniş yayılmış fikir də təsdiqini tapmayıb. İçkinin, xüsusilə yüksək dozada kofein qəbul edildikdə, yüngül sidikqovucu təsiri olsa da, bir fincandakı su itkini kompensasiya edir. Buna görə qəhvə içməyə öyrəşmiş insanlarda onun orta miqdarda qəbulu adətən orqanizmin su balansını pozmur.

Bundan əvvəl aparılan araşdırmalarda isə müntəzəm qəhvə içən insanların orta hesabla daha arıq olduqları və bədənlərində yağ toxumasının daha az olduğu müəyyənləşdirilmişdi. Alimlər bunun qəhvənin maddələr mübadiləsinə müsbət təsiri ilə bağlı ola biləcəyini ehtimal ediblər.

Adəm