İlan qanından "kokteyl” hazırlandı: Kim içsə... - MÖCÜZƏ

Amerikalı bioloqlar zınqırovlu ilanlarının qanında onların öz zəhərinin təsirini neytrallaşdıran zülallar aşkar ediblər.

Publika.az xəbər verir ki, alimlər qərb rombşəkilli zınqırovlu ilanın qanındakı qoruyucu zülalları araşdırıblar. Məlum olub ki, bu molekullar zəhərin toxumaları dağıdan, damarları zədələyən və daxili qanaxmaya səbəb olan komponentlərini bloklaya bilir.

Tədqiqatçılar zülalları xüsusi kombinasiyada birləşdirərək yeni “protein kokteyli” hazırlayıblar. Laboratoriya sınaqlarında bu qarışıq zəhərin ölümcül təsirini tamamilə neytrallaşdırıb və hazırda istifadə olunan antidotlardan birindən təxminən 10 dəfə daha effektiv olub.

Alimlərin fikrincə, kəşf daha təhlükəsiz və dəqiq təsir göstərən yeni antidotların hazırlanmasına imkan verə bilər. Ənənəvi zəhər əleyhinə preparatlar immun reaksiyalara səbəb ola bildiyi halda, konkret ilan zülallarından istifadə yan təsirləri və dərmanın dozasını azaltmağa kömək edə bilər.

Nəticələr hələlik yalnız laboratoriya və klinikadan əvvəlki sınaqlarda əldə edilib. Yeni preparatın insanlar üzərində sınaqdan keçirilməsi üçün əlavə təhlükəsizlik araşdırmaları aparılmalıdır.

Qeyd edək ki, araşdırma "Proceedings of the National Academy of Sciences (PNAS)" jurnalında dərc olunub.

Müəllif: Adəm