Xərçənglə bağlı yeni kəşf: 1 800-ə yaxın mikropetid aşkarlandı

Qüds İvrit Universitetinin alimləri əvvəllər az öyrənilmiş, xərçəngin inkişafı ilə əlaqəli ola biləcək təxminən 1 800 mikropetid aşkar ediblər.

Publika.az xəbər verir ki, tədqiqatın nəticələri "British Journal of Cancer" jurnalında dərc olunub.

Alimlər uzun müddət zülal istehsal edə bilmədiyi düşünülən uzun qeyri-kodlaşdırıcı RNT-lərin bəzi hissələrinin mikropetidlərin yaranması üçün məlumat daşıya biləcəyini müəyyənləşdiriblər. Mikropetidlər çox qısa zülal molekullarıdır.

Tədqiqat zamanı 10 minə yaxın şişin genom məlumatları ribosomların aktivliyi ilə bağlı nəticələrlə birləşdirilib. Kompüter modelləşdirməsindən də istifadə edən araşdırmaçılar 478 uzun qeyri-kodlaşdırıcı RNT tərəfindən kodlaşdırıldığı ehtimal edilən 1782 mikropetid müəyyən ediblər.

Onlardan 314-nün xərçəngin müxtəlif inkişaf mərhələlərində şişlərdə baş verən dəyişikliklərlə əlaqəli olduğu üzə çıxıb. Bəzi mikropetidlərin qeyri-adi quruluş və ardıcıllıq xüsusiyyətlərinə malik olması onların bioloji aktivliyə sahib ola biləcəyini göstərir.

Alimlərin sözlərinə görə, 314 mikropetidin səviyyəsi şişin müxtəlif mərhələləri üzrə dəyişib. Bu, onların şişin böyüməsini idarə etdiyini sübut etmir. Lakin həmin qanunauyğunluq mikropetidlərin şiş proseslərində rol oynaya biləcəyini və ya xəstəliyin gedişatındakı dəyişiklikləri izləmək üçün biomarker kimi istifadə edilə biləcəyini göstərir.

Müəllif: Adəm