Bildirçin yoxsa toyuq yumurtası? - Həkim fərqi açıqladı

Toyuq və bildirçin yumurtalarının qida dəyəri ümumilikdə bir-birinə yaxındır. Lakin bəzi mikroelementlərin miqdarına görə bildirçin yumurtaları üstünlük təşkil edir.

Publika.az “Qazeta.ru”ya istinadən xəbər verir ki, bunu qastroenteroloq Mariya Mercedes Burqos bildirib.

Onun sözlərinə görə, eyni çəkidə olan porsiyalar müqayisə edildikdə hər iki yumurta növündə zülal, yağ, vitamin və mineralların miqdarı təxminən eynidir. Buna görə də ümumi qida dəyəri baxımından ciddi fərq yoxdur.

Lakin bildirçin yumurtalarında dəmir, kalium və kalsium daha çoxdur. Bundan əlavə, B2 və B12 vitaminlərinin miqdarı da yüksəkdir. Bu maddələr sinir sistemi, əzələlər, ürək və sümüklərin normal fəaliyyəti, qan yaranması və maddələr mübadiləsi üçün vacibdir.

B2 və B12 vitaminləri həmçinin dəri, saç və dırnaqların sağlamlığının qorunmasında, eləcə də qidadakı zülal, yağ və karbohidratların enerjiyə çevrilməsində rol oynayır.

Həkim qeyd edib ki, həm toyuq, həm də bildirçin yumurtası balanslaşdırılmış qidalanmanın bir hissəsi ola bilər.

Müəllif: Roza