Az yatmaq ömrü qısalda bilərmi? - Alimlərdən diqqətçəkən ARAŞDIRMA

Yuxu müddətinin insan ömrünün uzunluğu ilə əlaqəsi qidalanma və fiziki aktivlikdən daha güclü ola bilər.

Publika.az xəbər verir ki, bu barədə "Sleep Advances" jurnalında dərc olunan araşdırmada qeyd olunub.

Oreqon Sağlamlıq və Elm Universitetinin alimləri ABŞ-da 2019-2025-ci illər üzrə aparılmış sorğuların məlumatlarını təhlil edərək insanların yuxu vərdişlərini gözlənilən ömür uzunluğu ilə müqayisə ediblər. Araşdırmada 7-9 saatlıq yuxu kifayət qədər, 7 saatdan az yuxu isə yetərsiz hesab edilib.

Nəticələr göstərib ki, yuxusuzluğun ömür uzunluğu ilə əlaqəsi siqaretdən imtina istisna olmaqla bir sıra digər amillərdən daha güclüdür. Piylənmə və diabet də nəzərə alındıqda isə yuxu ilə müqayisədə yalnız piylənmə daha güclü əlaqə göstərib.

Tədqiqatın müəlliflərindən Endryu MakHill yuxusuzluğun ömür uzunluğu ilə bu qədər güclü əlaqədə olacağını gözləmədiyini bildirib.

Alimlər bununla belə, araşdırmanın müşahidə xarakterli olduğunu və səbəb-nəticə əlaqəsini sübut etmədiyini vurğulayıblar. Onların fikrincə, yuxusuzluq stress, növbəli iş rejimi və müxtəlif xəstəliklər kimi digər problemlərin göstəricisi də ola bilər.

Mütəxəssislər böyüklər üçün adətən 7-8 saat yuxunu tövsiyə edirlər. 9 saatdan çox yatmaq da bəzi sağlamlıq problemləri ilə əlaqələndirilir.

Müəllif: Adəm