Bioloji yaşı azaltmağın SİRRİ AÇILDI

Pasportda göstərilən yaş təqvimdəki rəqəmdən başqa bir şey deyil və orqanizmin real vəziyyətini o qədər də dəqiq əks etdirmir. Daha vacib göstərici bioloji yaşdır: o, toxumaların həqiqi aşınma dərəcəsini, qan damarlarının vəziyyətini və maddələr mübadiləsinin sürətini göstərir.

Publika.az xəbər verir ki, bioloji yaşa necə təsir etməyin mümkün olduğunu Qazeta.ru-ya 2 saylı Dövlət Poliklinikasının baş həkimi Natalya Şindryayeva danışıb.

Mütəxəssisin sözlərinə görə, müasir tibbin əsas kəşfi bioloji yaşın idarə oluna bilən göstərici olmasıdır. Bunun üçün radikal tədbirlərə ehtiyac yoxdur, müəyyən vərdişlərə yiyələnmək kifayətdir.

Müntəzəm aerobika və güc məşqləri hüceyrələrin “enerji stansiyaları” olan mitoxondrilərin istehsalını stimullaşdırır, orqanizmin insulinə həssaslığını artırır və əzələləri damarları qoruyan, iltihabla mübarizə aparan mio­kinlər ifraz etməyə sövq edir.

Antioksidantlarla zəngin, balanslaşdırılmış qidalanma sürətli karbohidratların və transyağların qəbulunu azaldaraq hüceyrələri qlikasiyadan qoruyur. Qlikasiya nəticəsində dəri və qan damarları elastikliyini itirir. Tərəvəzlər və göyərti isə orqanizmi sərbəst radikalları zərərsizləşdirmək üçün lazım olan maddələrlə təmin edir.

Keyfiyyətli yuxu və sirkadiyalı ritmlərə riayət etmək də vacibdir. Belə ki, yuxunun dərin mərhələlərində zədələnmiş hüceyrə zülallarının təbii şəkildə “təmizlənməsi” prosesi olan autofagiya başlayır. Bu, beyin və daxili orqanların toxumalarının cavanlaşmasına birbaşa təsir göstərir.

Xroniki stressin idarə olunması telomerlərin uzunluğunu qorumağa kömək edir. Kortizol hormonunun daim yüksək səviyyədə olması xromosomların qoruyucu sahələrini “aşındırır” və damar sisteminin sıradan çıxmasını sürətləndirir. Gəzintilər, nəfəs məşqləri və diqqəti başqa istiqamətə yönəltmək bu prosesin qarşısını almağa kömək edir.

Əsas problem ondan ibarətdir ki, insan özünü gümrah hiss edə bilər, halbuki orqanizmin daxili ehtiyatları artıq tükənməkdədir. Buna görə də dəyişiklikləri vaxtında izləmək vacibdir.

Hüseyn İbadlı