Mədəaltı vəzi xərçənginin gizli əlamətləri - Həkimlər xəbərdarlıq etdi

Mədəaltı vəzi xərçəngi bəzi hallarda gözlənilməz simptomlarla özünü büruzə verə bilər. Həkimlər xəstəliyin erkən əlamətləri sırasında həzmsizlik, davamlı bel və qarın ağrısı, qəfil diabet yaranması və dəridə qaşınmanı qeyd ediblər.

Publika.az xəbər verir ki, bu barədə PanCAN (Mədəaltı vəzi xərçəngi ilə mübarizə təşkilatı) və Amerika Xərçəng Cəmiyyətinin (ACS) mütəxəssisləri "Men's Journal" nəşrinə danışıblar.

Mütəxəssislərin sözlərinə görə, şişlərin yaxınlıqdakı sinir və orqanlara təzyiq göstərməsi həzmsizliyə, eləcə də keçməyən bel və qarın ağrılarına səbəb ola bilər.

Onkoloqlar 50 yaşdan yuxarı insanlarda qəfil diabet yaranmasının da xəstəliyin mümkün əlaməti olduğunu bildiriblər.

ACS-nin mütəxəssisləri digər xəbərdaredici simptomlar sırasında dəridə qaşınma, gözlərin saralması, sidiyin tündləşməsi, nəcisin açıq rəngli və ya yağlı olmasını göstəriblər.

Bundan başqa, səbəbsiz çəki itkisi və əsasən ayaqlardakı iri venalarda qan laxtalarının yaranması da mədəaltı vəzi xərçəngindən xəbər verə bilər.

Qeyd edək ki, bu əlamətlər mütləq xərçəng xəstəliyinin olması demək deyil, lakin davamlı və izaholunmaz simptomlar müşahidə edildikdə həkimə müraciət etmək vacibdir.

Müəllif: Adəm