Səhiyyə

Azərbaycanda koronavirusdan ölən qadının vəfatı beş il sonra qeydə alındı

7 İyun 2025 18:36

Beş il əvvəl Bakıda vəfat edən Ağdam sakininin ölüm faktı bu il qeydə alınıb. Belə ki, ərizəçi şəxsin həyat yoldaşı 2020-ci ildə Bakı şəhəri Suraxanı rayonunda vəfat edib və həmin rayondakı Koroğlu qəbiristanlığında dəfn olunub. Kişi arvadının ölüm haqqında şəhadətnaməsini almaq üçün aidiyyəti orqanlara müraciət edib, ancaq qadının adına ölümə əsas verən zəruri sənədlər olmadığından məhkəməyə müraciət etməsi bildirilib.

Publika.az "Trend"ə istinadən xəbər verir ki, qadın 2020-ci ildə, 44 günlük vətən müharibəsi ərəfəsində Bakı şəhərində COVID-19-dan vəfat edib.

Həmin vaxt ərizəçinin başı qarışdığından arvadının ölümünü qeyd etdirməyib. Hazırda ölümün qeydə alınması üçün faktın təsdiq olunması zərurəti yaranıb.

Ağdam Rayon Məhkəməsinin qərarı ilə ərizə əsaslı olduğundan təmin edilib. Qadının 2020-ci ildə Bakı şəhəri Suraxanı rayonunda xəstəlikdən vəfat etməsi faktı müəyyən edilib.