Bu ölkənin mağazalarında tualet kağızı rəfləri boşaldı: Səbəb nədir?

Amerikalılar ölkənin şərqindəki və cənubundakı limanlarda işçilərin tətillərinin tualet kağızı qıtlığına səbəb olacağından narahat olublar.

Publika.az xəbər verir ki, istehlakçılar ABŞ-da mağazalardakı tualet kağızı rəflərini boşaltsa da, rəsmilər tətilin tualet kağızı və su kimi məhsulların tədarükündə böyük problem yaratmayacağını bildirib.

Amerika Meşəçilik və Kağız Dərnəyinin (AF&PA) prezidenti Heidi Brok bildirib ki, cari liman tətili ilə əlaqəli tualet kağızı çatışmazlığından xəbərdardır:

“Tualet kağızı, kağız dəsmal, salfet və üz təmizləyici salfetlər də daxil olmaqla ölkədəki kağız məhsullarına olan tələbatın təxminən yüzdə 85-i ABŞ istehsalçıları tərəfindən qarşılanıb. Onları istehsal etməyə davam edəcək və Birləşmiş Ştatlarda rəflərə çatdırmaq üçün dəmir yolu və yük nəqliyyatından istifadə ediləcək”.

Qeyd edək ki, ABŞ-ın şərq və cənubundakı limanlarda çalışan təxminən 45 min işçini təmsil edən ILA ilə işəgötürənləri təmsil edən USMX arasında yeni müqavilə danışıqlarında razılıq əldə olunmayıb. İşçilər 6 illik müddətdə maaşların 77 faiz artırılmasını tələb edirlər. 1977-ci ildən bəri ilk dəfə birliyin təşəbbüsü ilə başlayan və Mendən Texasa qədər onlarla ştatda 36 limanda əks olunan tətil daşımalara mənfi təsir göstərib.

Aysel Şahmar