Ev işləri münasibətləri pozur: Qadının ərinə qarşı nifrət hissinin səbəbi

"Ərimin ev işlərini davamlı olaraq mənə yükləməsi səbəbindən məndə ona qarşı ikrah hissi yaranıb".

Publika.az "Mirror" nəşrinə istinadən xəbər verir ki, belə bir şikayətlə adı çəkilməyən bir qadın münasibətlər üzrə ailə məsləhətçisi Kolin Nolana müraciət edib.

Qadının sözlərinə görə, hər ikisi işləsə də, evin bütün yükü onun üzərində qalıb. Qeyd edib ki, yemək hazırlamaq, ev təmizliyi, paltaryuyan və qabların yığışdırılması, həmçinin kommunal ödənişlər və evin təmiri kimi işləri əsasən özü görür.

“Ərim yalnız zibil vedrələrini boşaldır və düşünür ki, bununla da ev işləri bitir”, - deyə qadın bildirib.

Qadın deyib ki, həyat yoldaşı “sən daha yaxşı yemək bişirirsən”, “mən səliqəsizəm, qab-qacaq sındıra bilərəm”, “paltarları düzgün yuya bilmirəm” kimi tərif və bəhanələrlə iradları qəbul etmir. Qadın ərinin arqumentlərini inandırıcı hesab etmədiyini bildirib.

Kolin Nolan deyib ki, belə hallar zamanla münasibətləri ciddi şəkildə zədələyə bilər. O, qadına sakit bir məqam seçərək hisslərini açıq şəkildə həyat yoldaşına izah etməyi tövsiyə edib.

"Ona deyin ki, artıq özünüzü əsəbi bir qadın kimi hiss etməyi xoşlamırsınız. Və bu, normal bir şey deyil, əksinə, ədalətsizlikdir. Xüsusilə uşaqlarınız olduqdan sonra onun aktiv dəstəyinə etibar edə biləcəyinizi hiss etməlisiniz", - deyə mütəxəssis bildirir.

O, həmçinin bildirib ki, kişiyə yeni işləri öyrənmək və səhv etmək imkanı verilməli, bu prosesdə sərt tənqiddən qaçınılmalıdır.

Adəm