İntiharlarla bağlı dəhşətli statistika: Yeniyetmələr arasında antirekord

Yaponiyada 2025-ci ildə intihar hallarının ümumi sayı rekord həddə qədər azalsa da, yeniyetmələr arasında bu göstərici tarixin ən yüksək səviyyəsinə çatıb.

Publika.az xəbər verir ki, bunu Yaponiya Nazirlər Kabinetinin baş katibi Minoru Kihara keçirdiyi mətbuat konfransında deyib.

Onun sözlərinə görə, ötən il ölkədə qeydə alınan intiharların sayı müşahidələrin aparıldığı bütün dövr ərzində ən aşağı göstərici olub. Lakin ibtidai, orta və yuxarı məktəblərdə təhsil alanlar arasında intihar hallarının sayı rekord həddə yüksəlib.

Yaponiya Səhiyyə Nazirliyinin məlumatına görə, 2025-ci ildə ölkədə 19 188 intihar qeydə alınıb. Bu, 1980-ci ildən aparılan statistika ərzində ilk dəfə göstəricinin 20 minlik həddən aşağı düşməsi deməkdir.

Yeniyetmələr arasında vəziyyət daha da ağırlaşıb

Bununla yanaşı, yetkinlik yaşına çatmayanlar arasında intiharların sayı artıq ikinci ildir artır və 2025-ci ildə 1 082 nəfərə çatıb. İbtidai, orta və yuxarı məktəb şagirdləri arasında isə 538 intihar qeydə alınıb. Bu, həmin kateqoriya üzrə bütün müşahidə dövrünün ən yüksək göstəricisidir.

Kihara bildirib ki, hökumət psixi sağlamlıq, sosial müdafiə və məşğulluğa dəstəyi birləşdirən kompleks yardım və məsləhət sisteminin genişləndirilməsi istiqamətində işləri davam etdirir.

O qeyd edib ki, uşaqlar və gənclər arasında intiharların qarşısının alınması üçün sosial şəbəkələr üzərindən məsləhət xidmətlərinin genişləndirilməsi, eləcə də yardıma ehtiyacı olanların erkən müəyyənləşdirilməsinə yönəlmiş fəal dəstək mexanizmləri tətbiq olunur.

Yaponiyada intiharlara qarşı mübarizə həftəsi çərçivəsində bu mövzuda maarifləndirmə işləri də gücləndirilir. Kihara hökumətin hər kəsin intihara sürüklənməyəcəyi bir cəmiyyət yaratmaq üçün mümkün olan bütün tədbirləri görəcəyini vurğulayıb.

Müəllif: Adəm