Dövlət qulluğu ilə bağlı məcəlləyə dəyişikliklər təklif olunur

Azərbaycan Respublikasının Milli Məclisinə “Azərbaycan Respublikası Dövlət Qulluğu Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” qərar layihəsi təqdim edilib.

Publika.az xəbər verir ki, layihəyə əsasən, yeni Dövlət Qulluğu Məcəlləsi təsdiq ediləcək və qüvvəyə mindiyi gündən bir sıra qanunlar ləğv olunacaq.

Ləğvi nəzərdə tutulan qanunlar arasında “Dövlət qulluğu haqqında”, dövlət qulluqçularının ayrı-ayrı kateqoriyaları üçün qısaldılmış iş vaxtı, dövlət qulluğunu idarəetmə şurası, dövlət qulluqçularının vəzifə maaşlarına yerli əmsallar, təhlükəli və xüsusilə ağır qulluq şəraiti üçün artıq əmsallar, eləcə də dövlət qulluqçularının etik davranış qaydaları ilə bağlı qanunlar yer alır.

Layihəyə görə, digər normativ hüquqi aktlar yeni Məcəlləyə uyğunlaşdırılanadək ona zidd olmayan hissədə tətbiq ediləcək.

Həmçinin qüvvədə olan qanunvericiliyə əsasən inzibati vəzifə üzrə test imtahanından keçdiyini təsdiq edən və etibarlılıq müddəti başa çatmayan dövlət qulluğu sertifikatına malik şəxslər sertifikatlarının qüvvədə olduğu müddətdə yeni Məcəlləyə uyğun olaraq müsahibələrdə iştirak edə biləcəklər.