Erməni deputat “Bakıda hər şeyi bilirlər” deyib hərbi sirri yaydı - Detallar

Ermənistanın hakim partiyası daxilində qarşıdurma yaranıb.

Publika.az xəbər verir ki, “Vətəndaş müqaviləsi”nin deputatı Hayk Sarkisyan Müdafiə Nazirliyini, o cümlədən, nazir Suren Papikyanı sərt tənqid edib.

Erməni deputat bildirib ki, orduda elementar gigiyena standartlarına əməl edilmir: “Əsgərlər həftədə bir dəfə hamamdan istifadə edə bilirlər”.

Hayk Sarkisyan hərbi sirr hesab olunan məlumatı da açıqlayıb. Bildirib ki, son 10 ildə orduda çağırışçıların sayı 44 mindən 14 minə düşüb. Jurnalistlər bu cür məlumatların açıqlanmasının yolverilməz olduğunu desə də, erməni deputat “onsuz da düşmən Ermənistan ordusu haqqında hər şeyi bilir” deyə cavab verib.

“44 günlük müharibə zamanı Azərbaycanın Ermənistan bölmələrinin və komandanlığının hər bir hərəkətini, təchizat yollarını və yerləşməsini bilməsi faktı ortadadır. Bakıda hər şeyi bilirlər”, - o deyib.

Qeyd edək ki, Hayk Sarkisyanın adı növbəti parlament seçkilərində partiyanın seçki siyahısından çıxarılıb. Bundan sonra onun hakim komandaya qarşı ittihamları güclənib.

Asif