Paşinyandan Rusiyaya qarşı ŞOK GEDİŞ - Türkiyə ilə sərhəddə...

Ermənistanın İran və Türkiyə ilə sərhədlərini hazırda qoruyan Rusiya sərhədçilərini Ermənistan sərhədçiləri əvəz edəcək.

Publika.az xəbər verir ki, bu barədə Ermənistanın Baş naziri Nikol Paşinyan məlumat verib.

Paşinyan bildirib ki, ölkənin imkanları artdıqca, sərhədin mühafizəsi tədricən yerli qüvvələrin nəzarətinə keçəcək:

"Resurslarımız artdıqca, biz tədricən sərhədin getdikcə daha çox hissəsini nəzarətə götürə bilərik".

Baş nazir qeyd edib ki, Ermənistan tərəfi göstərilən xidmətə görə Rusiya sərhədçilərinə ödəniş edir. Rusiya tərəfi isə bu xidmətlərin qiymətinin artırılması məsələsini qaldırıb. İrəvan rəhbərliyi isə artan vəsaiti öz sərhəd potensialının inkişafına xərcləməyin zəruri olduğu qənaətinə gəlib.

"Tədricən rusiyalı həmkarlarımız bizim üçün ağır olmayacaq məbləğlər çərçivəsində qalacaqlar, qalan sahələrə isə nəzarəti biz öz üzərimizə götürəcəyik. Bu, müqavilədə nəzərdə tutulub", - deyə baş nazir bildirib.

Fevral ayında Nikol Paşinyan Rusiya hakimiyyətinə Ermənistanın dəmir yollarının konsessiyasını (idarəetməsini) hər iki dövlətə dost olan ölkələrdən birinə satmağı təklif etmişdi. Baş nazir vurğulayıb ki, Ermənistanın Rusiyaya qarşı heç bir etirazı yoxdur, lakin mövcud idarəetmə sistemi ölkə üçün "müəyyən rəqabət itkiləri" yaradır.

Hüseyn İbadlı