Paşinyan Putinə cavab verdi: Seçim etmək zərurəti yaranarsa…

Ermənistan, digərləri kimi, Avrasiya İqtisadi Birliyinin tamhüquqlu üzvü olaraq qalır.

Publika.az “Sputnik Ermənistan”a istinadla xəbər verir ki, bunu baş nazir Nikol Paşinyan jurnalistlərə verdiyi müsahibədə bildirib.

"Biz AİB-nin tamhüquqlu üzvləriyik və onun bir hissəsi olduğumuz müddətcə bütün proseslərdə iştirak edirik. Hazırda bu məsələni qaldırmağa ehtiyac yoxdur və biz onu gündəliyə salmağa hazırlaşmırıq. Referendum obyektiv ehtiyac yarandıqda keçiriləcək", - deyə o qeyd edib.

O, Rusiya prezidenti ilə bu mövzuda işgüzar müzakirələr apardığını bildirib. Paşinyan AİB və Aİ haqqında açıq danışdığını və de-yure ilə de-fakto arasında seçim etmək zərurəti yaranana qədər bu məsələnin hazırkı kabinetin gündəliyinə daxil edilməyəcəyini bildirib.

Daha əvvəl Rusiya prezidenti Ermənistanın Avropa İttifaqına daxil olması ilə bağlı mümkün qədər tez qərar verməli olduğunu bildirmişdi. O, bunun həm Ermənistan vətəndaşları, həm də onların əsas iqtisadi tərəfdaşı Rusiya üçün doğru addım olacağını söyləyib. Rusiya lideri bu məsələ ilə bağlı mümkün referendum keçirilməsini məntiqli adlandırıb.

Müəllif: Publika.az